Тываның Чазааның аппарат хуралынга регионнуң девискээринде COVID-19 талазы-биле эпидемиологтуг байдалды сайгарган. Росхереглекчилер хайгааралының Тыва Республикада эргелелиниң эрткен неделяда чоруткан оперативтиг шинчилелинден көөрге, республикада коронавирус халдавырындан аараан 45 таварылга бүрүткеттинген, эрткен неделяның көргүзүүнден 15 катап хөй.
Республиканың Баштыңы Владислав Ховалыг аарыыр чоруктуң санын өстүрбес дээш, профилактика ажылын күштелдирерин чогуур ведомствога онааган.
Кызыл хоорайда – 31, Кызыл кожуунда – 9, Таңдыда – 2, Тожу, Улуг-Хем база Каа-Хем кожууннарда 1-1 COVID-19-тан аараан таварылгалар демдеглеттинген.
Аараан улустуң аразында: 1-ден 14 харга чедир – 23, 18-тен 65 харга чедир – 13, 65 хардан өрү назылыг 9 кижи бар.
Эрткен неделяда Халдавырлыг аарыглар эмнелгезинге 43 аарыг кижини чыттырган, олар шупту ковидтээни тодараттынган, азы шупту аарыг улустуң 95,5 хуузу. Эъди изип, мага-боду ыстап, шаг чокталып, аараан кижиниң байдалы салгалыг эртип турары демдеглеттинген.
2025 чылдың эгезинден бээр республиканың девискээринге COVID-19-тан аарааны лабораторияга бадыткаттынган 199 таварылга бүрүткеттинген. Уруглар албан черлеринде база социал коллективтерде COVID-19-тан бөлүү-биле аараан таварылгалар бүрүткеттинмээнин Росхереглекчилер хайгааралының эргелели дыңнаткан.
Владислав Ховалыг профилактика ажылдарын идепкейжидерин тускай угланыышкынныг ведомстволарга дааскан: хөй улус чыылган черлерге маскаларны кедерин, ырак турар хемчээлди, арыг-силигни сагыырын база катап сагындырар.
Республиканың Кадык камгалал яамызы айыылдыг бөлүктүң кижилеринге гриппке удур тарылганы сентябрь төнчүзүнге чедир чорудар даалганы берген.
Өөредилге яамызы чаа өөредилге чылы эгелээринге чедир шупту өөредилге черлериниң ажылдакчыларын гриппке удур тарыткан турарын хандырар.
Чыжыргана СААЯ.
Чурукту интернеттен хоолгалаан.
“Шын” №32 2025 чылдың август 21