Тыва Республикада арага болгаш спирт холумактыг барааннарны хоойлуга удур садып-саарары-биле демисежир ведомстволар аразының «Суррогат» деп профилактиктиг операциязы чоруп турар. Бо операция 2030 чылга чедир регионга арага ижерин эвээжедир концепцияны боттандырар дээш чорудуп турар. 2025 чылдың төнчүзүнге чедир күүселде, контроль болгаш профилактика хемчеглериниң комплекизин боттандырар.
Декабрь 17-ден 30-ге чедир корум-чурум камгалаар органнар тус чер чагыргалары-биле кады арага продукциязын хоойлуга удур садып турар деп каразыттырган садыг черлерин хынаар. Чаңгыс аай күрүнениң автоматчыткан информация системазынче садыгларны кошканын хынап, садып алыышкыннар медээлериниң анализинче онза кичээнгейни угландырар.
Кожууннарда хөй-ниити корум-чурумун тудар постуларны, ол ышкаш «Шивилиг» стационарлыг постузунче күштелдирер, регионче арага суксуннарын хоойлуга удур киирбес дээш, улусчу дружиналарны хаара тутпушаан, дежурныйлаашкынны күштелдирер.
Хөй-ниити черлеринде эзирик кижилерни илередип, улаштыр тускай албан черлеринче сугар хемчеглер база болур. Ол ышкаш арагалаар кижилер болгаш чедимче чок өг-бүлелер-биле профилактиктиг ажылдарны база чорудар.
Республиканың өөредилге черлеринге назы четпээннерге амыдыралдың кадык овур-хевириниң дугайында лекцияларны эрттирер. Күрүне албан черлеринге эзирик машина мунуп болбас деп өөредигни бээр. Хоойлуга удур арага садыглаашкыны дээш шииткелдерниң болгаш араганың салдарының дугайында медээлерни өөредилге, эмчи, социал албан черлери болгаш оперативтиг албан черлериниң социал четкилерде арыннарын таварыштыр идепкейлиг тарадыр.
А. МОНГУШ.
Чурукту ТР-ниң Чазааның парлалга албанындан алган.
“Шын” №50 2025 чылдың декабрь 25