Декабрь 14-те Россия Федерациязының Президентизи Владимир Путин-биле чаңчыл болган «дорт шугум» болуп эртер.
Бо удаада күрүне баштыңы «дорт шугум» биле түңнел парлалга-конференциязын каттыштырып, “Владимир Путин-биле чылды түңнеп” деп чаа хевирге ужуражылганы эрттирер деп, Президентиниң парлалга-секретары Дмитрий Песков дыңнаткан.
Декабрь 1-ден эгелеп, чурттуң баштыңынга салыр айтырыглар чыылдазын moskva-putinu.ru сайтка, «ВКонтакте», «Одноклассники» социал четкилерге хүлээп турар болгаш мобильдиг капсырылгалар дамчыштыр 0-40-40 дугаарже халас СМС-тер, 8-800-200-40-40 дугаарже халас долгааш, айтырыгларын салып болур.
Президентиниң чылды түңнээн кол хемчеглеринче российжи регионалдыг болгаш федералдыг журналистерни, даштыкы МИЧ-тиң аккредитациялыг ажылдакчыларын чалаар.
“Дамчыдылга ооң мурнунда ышкаш телеканалдарга дорт үнер. Президент хамаатыларның айтырыгларынга харыылаар болганда, дорт дамчыдылга болгаш түңнел конференция хевирлиг болуп эртер. Москвага аккредитация эрткен регионалдыг, федералдыг, даштыкы массалыг информация чепсектериниң журналистери студияга турар” – деп, РФ-тиң Президентизиниң парлалга-секретары чугаалаан.
Чурт баштыңы-биле болур ужуражылга каш шак иштинде үргүлчүлээри амдыызында тодаргай эвес, ындыг болзажок ол элээн каш шак үргүлчүлээр чадавас деп демдеглээн.
Владимир Путинниң дорт шугуму база парлалга-конференциязы 2001 чылдан бээр эртип турарын сагындыраал. Эрткен чылын чурт баштыңы улуг парлалга-конференциязын эрттирбээн-даа болза, журналистерниң эң-не чидиг айтырыгларынга харыылаан.
«Шын» №93 2023 чылдың декабрь 6