Ам Кызыл хоорайның Хөй хүлээлгелиг төвүнде күрүнениң "Хөмүр-даш продукциязы" медеглел системазынга бүрүткедип ап база хөмүрнү чиигелделиг өртек-биле садып алырының QR-кодун ап болур апарган. Базым аайы-биле канчаар бүрүткедириниң өөредилгезин төптүң специалистеринге республиканың Одалга болгаш энергетика яамызының ажылдакчылары эрттирген.
«Регионнуң чурттакчы чону күрүнениң «Хөмүр-даш продукциязы” медеглел системазынга бүрүткедирде бергедээшкиннерге таваржып турар. Ынчангаш бо ажылга Хөй хүлээлгелиг төптүң специалистерин киириштирер деп шиитпирге келген бис. Ам найысылалдың чурттакчы бүрүзү бүрүткедиринге база QR-код алырынга дуза херек апарганда, Кызылдың Хөй хүлээлгелиг төвүнүң специалистериниң дузазын ап болурлар, айтырыглар тургустунуп келгенде call-төптүң 8-800-200-33-96 дугаарлыг телефонунче долгап болурлар” — деп, республиканың Одалга болгаш энергетика яамызының оттулар чүүл-биле хандырылга килдизиниң начальниги Адис Дондуп чугаалап турар.
Кызылдың Хөй хүлээлгелиг төвүнде Интернетте кошкан бүгү-ле компьютер дериг-херекселдери бар. Ындыг чүүл интернеди чок хамаатыларга хөлчок таарымчалыг.
Тываның Хөй хүлээлгелиг төвүнүң директору Аркадий Өдегейниң чугаазы-биле алырга Хөй хүлээлгелиг төпке кол нуруузунда улуг назылыг улус дуза дилеп кээп турар. Специалистер оларга электроннуг QR-кодту саазынга дүжүрүп парладырынга дузалажып турарлар.
Медеглел системазы бодунда хереглекчиге херек медээ-дыңнадыгларны хаара туткан – чагырга черлериниң бүрүзүнде оттулар чүүл шыгжамырларында хөмүрнүң бар-чогундан эгелээш, ооң өртек-үнезинге чедир. Порталга үш арга-биле бүрүткедип ап болур, эң дүрген болгаш тарымчалыы – “Күрүне ачы-дузазы” системазын таварыштыр бүрүткедири болгаш бажың-балгат карточказын долдурары болур. Ийиги арга – медеглел системазынга бүрүткедир болгаш бодун таныштырбайн чыткаш, “Күрүне ачы-дузазы” системазын таварыштыр анкетаны долдурары. Бүрүткелдиң үшкү аргазы – хууда кабинетти ажыдып бээри-биле чагырга черинге баары.
Бүрүткел эрткен соонда ажыглакчы бүрүзүнге бажың-балгат карточказын долдурар, оон бажыңның шөл бүрүзүн барымдаалап чарыгдап турары хөмүр-дажының үлүүн, а ол ышкаш садып алган хөмүрүнүң болгаш ооң артыын көрүп ап болур.
ТМГ-ниң медээлеринден А.ХЕРТЕК белеткээн.
"Шын" №70 2023 чылдың сентябрь 16