Тывада 12 ажыг чыл иштинде узамдыгып келген тудуг – Каа-Хем суурда спорт-культура төвү. Республиканың Баштыңы Владислав Ховалыг тудугга чорааш, тудуг ажылдарын хынаан. Бо удаада тудугну дужаар үезин соңгаарлатпазынга ол идегеп турар. Чүге дизе тудугжулар иштики ажылдарже база дериг-херекселдер эптээринче кирген.
Каа-Хемниң СКТ регионда тудуп турар объектилерниң эң “кырганы” дээрзин сагындыраал. Тудугну 2012 чылда-ла федералдыг болгаш республика бюджеттеринден кады акшаландырыышкын-биле тудуп, ону ийи чыл болганда ажыглалче дужаар турган. Инвестиция республикада хүлээлгелеринде бодунуң кезээн күүседир акша-хөреңгизи чедишпээнинден ажылдар ара турупкан.
Оон дараазында чылдарда аңгы-аңгы дөстерден акша-хөреңгини бичии-бичиилеп тыптынып турганындан ажылдар ында-хаая чоруп турган. «Демография» национал төлевилелче спорткомплексти киирерин чедип алгаш, ооң турум акшаландырыышкынын хандырган.
Комплекс 7 муң көрүкчү кире бээр олуттуг, хөй ажыглалдыг ийи каът ареналыг улуг тудуг. Ында волейбол, баскетбол, мини-футбол, гандбол, хүреш дээш өске-даа тыва аныяктар ортузунда эң нептереңгей спортчу хевирлериниң залдары бар.
Владислав Ховалыг спорт-культура төвүн шын ажыглаар аргаларны амдыгааштан дилеп, саналдаар даалганы берген. Бир талазында, эң хөй кижилерни спортче калбаа-биле хаара тудар чер болур ужурлуг, өскезинде – бо хире улуг оран-саваны ажаалда-ажыглалы аар болганда, хандырылгазынче акшаны ажылдап алыр апаар.
Республиканың Баштыңы 2024 чылда ажыглалче дужаар ужурлуг өске үш чугула объектилерге четкен – Каа-Хем суурда, Кызылдың «Спутник» микрорайонунда школа тудугларынга база капитал септелгеде 4 дугаар школага. Сооктар дүшпээнде баштай даштыкы шеверлел ажылдарын база девискээр чаагайжыдылгазын доозарын Владислав Ховалыг негээн.
Кызылдың 4 дугаар школазының капитал септелгезиниң доозарының керээде айыттынган хуусаазы октябрь 30-ге ындыг болзажок ажылдар дүрген чоруп турарын Тываның Баштыңы демдеглээн. «Суг болгаш чылыг хандырылгазының системаларын солаан. Школаның даштын малгаштап, кирер чадазын чаартып турар. 4 дугаар школа чаа эт-сеп, өөредилге дериг-херекселдери четчелеттинген амгы үениң чаа школазы апаар ужурлуг».
А. МОНГУШ.
Чингис СААЯНЫҢ тырттырган чуруктары.
«Шын» №72 2024 чылдың сентябрь 21
