Ноябрь 20-де “Ада-чурт камгалакчылары” күрүне фондузунуң Тывада салбырының удуртукчузу Мерген Кызыл-оол биле Федералдыг суд приставтарының Тывада эргелелиниң ажылдакчылары ужурашкан.
Ужуражылга үезинде эргелелдиң удуртукчузунуң түр када хүлээлгезин күүседип турар Аяс Кара-оол биле улуг инспектор Гармаханда Монгуш ТШО киржикчилериниң болгаш оларның өг-бүлелериниң эрге-ажыын камгалаар талазы-биле юридиктиг дуза көргүзер дугайында Фондунуң удуртукчузу-биле чугааны кылган.
Федералдыг суд приставтарының Тывада эргелелиниң ажылдакчылары ТШО киржикчилеринден, оларның өг-бүлелеринден өрелиг дээш суд шиитпириниң күүселдезин болгаш өрезин эгидер акша чыылдазын соксадырының дүрүмүн тайылбырлап бээри-биле эргелелдиң удуртукчузу хууда хүлээп алыышкыннарны удаа-дараа чорудуп турарын дыңнаткан.
“Ада-чурттуң мурнунга бодунуң хамааты хүлээлгезин күүседири-биле ТШО-да мурнуку одуругда чоруп турар дайынчыларның болгаш онза хайгааралда турар оларның өг-бүлелериниң киирген бидириишкиннерин саат чокка сайгарып турар бис” – деп, Аяс Кара-оол чугаалаан.
Ужуражылганың түңнелинде ТШО киржикчилери-биле ужуражылгаларны болгаш хууда хүлээп алыышкыннарны, консультацияларны доктаамал чорударын дугурушканнар. Ол ышкаш кожууннарда ТШО киржикчилери-биле салбырның координаторлары сырый харылзаалыг ажылды уламчылаарын чугаалашкан.
Бистиң корр.
Чуруктарны Федералдыг суд приставтарының Тывада эргелелиниң парлалга албанындан алган.
“Шын” №91 2024 чылдың ноябрь 27
