Бок үнүштер дугайында
Бир-ле катап чазын кырган-адашкылар огородка бок үнүштер аштап турганнар. Уйнуу кырган-ачазындан айтырган: «Бистиң тарываанывыс бок үнүштер чүге эки өзерил, а олуртуп каан үнүштеривис улуг кичээнгей, сагыш салыышкын база күш негээрил?
«Эскериичел чорууңнуң ачызында бодуңга чугула ажыдыышкын кылдың: кижиге шупту үнелиг база ажыктыг чүүлдер эвээш эвес күштү негээр, а хоралыг болгаш ажык чок чүүлдер боттары-ла өзүп үнер» — деп, кырган-ачазы харыылаан.
Ынакшыл
— «Сонуургал» биле «Ынакшылдың» аразында ылгалы чүдел?
— Кажан чечекти чарашсынып, сонуургай бергениңерде, ону тура соп алыр болгай силер. А бир эвес чечекке ынак болзуңарза, ону хүннүң-не суггарар силер.
Кадайланыр бе азы...
Бир мерген угаанныг кырганга аныяк оол келгеш, чугаалаан:
— Меңээ силерниң сүмеңер херек, хүндүткелдиг кырган. Мен бир кысты дыка сонуургап тур мен. Ам чүнү канчаар аайын тыппайн, хилинчектени бердим: кадайланыр бе азы чок бе.
— Өгленме.
— А чүге?!
— Бир эвес сен ону ылап күзеп турган болзуңза, менден айтырбас турган сен.
Делегейже ийи көрүш
Бир эвес сээктен бо чоок-кавыда чечектер бар бе деп айтырар болза: «Билбес мен. А өдек, чуунду ол кезекте долу» — деп харыылаар. Оон ол шупту барган бок, чуундуларын санап адап-ла эгелээр.
А бир эвес арыдан: «Бо чоок-кавыда бок, чуунду көрбедиң бе?» — деп айтырар болза, ол: «Бок, чуунду? Чок, каяа-даа көрбедим. Мында чаагай чыттыг чечектер хөй!» — деп харыылаар.
Сээк кандыг-даа чечектиг шынаага эң-не хирлиг черни тып алгаш, аңаа хонуптар, а ары эң-не чыт-бустуг тулаага безин, алаң-тос чечээн тыпкаш, ооң чулуун чыып алыр.
“Шын” №88 2024 чылдың ноябрь 16