Ренат Ооржак – Москвада Россияның Улустарның найыралы университединиң 2003 чылда, Тываның күрүне университединиң 2018 чылда доозукчузу. 2022 чылда Тываның өөредилге сайзырадыр болгаш мергежил бедидер институдунга «Ниити өөредилге чериниң башкызы (эртем), «математика башкызы» талазы-биле профессионал эде белеткелди эрткен. Ол ышкаш Россия Федерациязының Президентизиниң чанында Россияның улус ажыл-агый база күрүне албанының академиязын дооскан.
Ренат Чадамбаевич Россия Федерациязының Экономиктиг сайзырал болгаш садыг яамызынга аңгы-аңгы албан-дужаалдарга база Москва хоорайда Тыва Республиканың бүрүн эргелиг төлээзинге ажылдаан. Республиканың күрүне албанынга эрге-дужаалдарны ээлеп турган. 2015 чылда Тыва Республиканың Баштыңының Администрациязынга база Тыва Республиканың Чазааның Аппарадынга ажылдап турда, 2016 чылда республиканың экономика сайыдының оралакчызынга томуйлаан, ол Тыва Республиканың Баштыңының чөвүлекчизи чораан.
Тываның сайгарлыкчыларның эргелерин камгалаар бизнес-омбудсмен болуп 2020 чылдан бээр ажылдап чоруур.
Ренат Ооржак хөй-ниити ажылының идепкейжизи. Тыва Республиканың шыдыраа федерациязының удуртукчузу. Ооң удуртулгазы-биле сөөлгү чылдарда республикада чаа беш шыдыраа клуву ажыттынган: «Гроссмейстер», «Гамбит», «Этюд», «Белая ладья», Шуй суурда шыдыраа клуву. Шыдыраага дүрген ойнаарының делегей чемпиону Сергей Карякинни Тываже келирин организастаан. Ренат Ооржактың бот-идепкейи-биле Президент грантыларының фондузундан ийи шыдыраа клувун септээш, дерээн, «Хоочуннарывыска онлайн-шыдыраалар» деп төлевилелди ажылдаткан.
ТР-ниң Чазааның парлалга албаны.
«Шын» №84 2024 чылдың ноябрь 2