ТР-ниң Чазак Даргазының оралакчызы Эдуард Санданның удуртулгазы-биле эрткен ажылчы бөлүктүң ээчеглиг хуралынга одалга-энергетика курлавырлары дээш база чуртталга-коммунал ачы-дуза чедирилгези дээш өрелерни эвээжедир талазы-биле хемчеглерни күштелдирериниң дугайында айтырыгларны чугаалашкан. Аңаа хереглекчилерниң төлевир чорудар чурумунуң амгы байдалын сайгарып көрген. Ол ышкаш чыглып турар өрелерниң чылдагаанын анализтээн болгаш ону эвээжедир талазы-биле чорудар хемчеглерни тургускан. Онза кичээнгейни чурттакчыларның өрелеринден аңгыда, республика болгаш муниципалдыг албан черлериниң удуртукчуларынче угландырган.
Бо хүнде регионда чуртталга-коммунал ачы-дуза чедирилгези дээш өрениң хемчээли 2 млрд рубль ашкан. Бо чылдың чүгле январь айында 341 сая рубль, азы 13,6 хуу көвүдей берген. Хуусаазы эрте берген өрелер барык 1,9 млрд рубль четкен болгаш ам-даа өспүшаан.
Өрелерниң кол кезии – барык 1,8 млрд рубль – чурттакчы чоннуң болуп турар. Албан черлериниң өрелери 375 сая рубль, оларның аразында бюджет албан черлери база кирип турар.
“Бо чылдың март айының эгезинден тура “Россети Сибирь Тываэнергонуң” специалистери ниити түңү 80 сая рубль өреге хамаарыштыр хамаатыларже 11 муң ажыг дыңнадыышкынны чоруткан. Оларның аразындан 827 абонемент өрелерин дуглаан, өскелери 20 хонук дургузунда өрезин төлевес болза, электроэнергия чок артып каарының кырында келген” – деп, “Россети Сибирь Тываэнерго” дыңнаткан.
Регионда төлевирлер чыылдазы 91 хуу артпышаан. Ол дээрге курлавыр хандырылгазын чорудуп турар организациялар он рубль бүрүзүн чедир албайн турар. Ындыг байдал септелге ажылдарын чорударынга бергедээшкиннерни тургузар болгаш берип турар ачы-дуза чедирилгезиниң шынарынга багай салдарлыг болур.
Чазактың оралакчы даргазы курлавыр хандырылгазын чорудуп турар организацияларны профилактика ажылын күштелдиреринче кыйгырган. Ол ышкаш муниципалдыг тургузуглар удуртукчуларынга одалга сезонунда үзүктелиишкиннерни тургуспазы-биле төлевирлер чыылдазының хыналдазын күштелдирерин дааскан.
Тываның Чазаа бо талазы-биле байдалды доктаамал хыналдада алган болгаш чуртталга-коммунал ачы-дуза чедирилгези дээш төлевирлерни үе-шаанда чорударынче чурттакчы чонну кыйгырган. Саң-хөө талазы-биле бергедээшкиннерге таваржы берген хамаатылар эргелеп-баштаар компанияларже азы курлавыр хандырылгазын чорудуп турар организацияларже чедип, өрезин үзүктеп төлээр кылдыр бижидип алыр. Ол ышкаш чуртталга-коммунал ачы-дуза чедирилгезин төлээри-биле субсидия алырының дугайында социал камгалал органнарынче билдириишкин киирерин сүмелеп турар.
Бистиң корр.
Чурукту ТР-ниң Чазааның парлалга албанындан алган.
“Шын” №11 2026 чылдың март 26