Кызыл хоорай чагыргазының айтыышкыны-биле хоорайның төвүнде август 18-тен 31-ге чедир ярмарканы организастап каан. 28 майгын болгаш бир киоскуда хууда сайгарлыкчылар хүннүң-не өөредилге херекселдерин садып турар.
Ажыл аайы-биле садыг-саарылга чоруп турар черниң ортузу-биле хүннүң-не эртип тургаш, бир хүн черле сонуургап көрдүвүс. Садып алыкчылар бирде көвүдей-даа бээр, бирде көңгүс ээн-даа апаар. Бир аныяк өг-бүле Кочетов кудумчузунуң талазындан чедип келгеш, бир дугаар-ла таварышкан майгынындан кыдырааштар, демир-үжүктер, карандаштарны садып ап турар болду. Өртектерге таарзынып турар болган-дыр дээш, сонуургап айтырарывыска: «Өртектер-даа деңневейн тур бис. Биске анаа-ла хостуг кылаштап чорааш, шупту херекселдерни чаңгыс черден чыып садып алыры эптиг чүве-дир. Ышкам садыгга оочурлаанындан арыг агаарга таваар садыгланып алыры кедилиг» – деп харыылады.
Элээди уруглар халчып келгеш, майгын бүрүзүнден дневниктер шилип маңнажып тур. Даштында чуруктарын-на сайгарып чоруп турар. Чогум та кандыызы херек турган, кайызын-даа албайн чоруптулар. Бир уруг өртээниң аарынга таарзынмайн турарын садыгжыга ажыы-биле чугаалааш, чоруй барды.
Бичии уруг эдерткен аныяк ава майгын бүрүзүнден эртемнер аайы-биле хөй арынныг кыдырааштар өртектерин айтырып-айтырып, мүн-не бирээзинден садып ап турар болду.
Хөй майгыннар аразында 4 хире майгын тускай чарлалдыг ажылдап турарын эскердивис. «1500 акшадан өрү өртек-биле бараан садып алыр болзуңарза, Айфон ойнаашкынынга киржир силер» деп чарлалдар аскылап алган. Садып алыкчылар оларның бараанын ап турар болду. Бир майгында аныяк садыгжы оолдан сонуургап айтырарывыска, август 31-ге чедир бо бараанын төндүр садыптарынга бүзүрели улуг болду. Акцияда киржип турар садып алыкчылар база хөй, мөөң акша-биле бараан садып алган улустуң адын, телефон дугаарынга саазынга бижиткеш, ойнаашкынга киириштирер кылдыр арттырып ап турар. Аазап турары айфонну сентябрь 5-те эрттирер. Айрана Кара-Сал деп хууда сайгарлыкчы садыг-саарылганың мындыг аргазын ажыглап турар болду.
Кожууннардан кээп садыгланып чоруур өг-бүлелер база эвээш эвес. Чугула өөредилге херекселдерин чайын-на бичиилеп, өртектери чүгээр турда, Вайлдберриз, Озон чижектиг маркетплейстерден чагыдып ап турарын чажырбас ада-иелер база хөй таварышты. Өөренирде кедер идик-хепти, номнарны, кыдырааштарны интернет-садыглардан садып алыры эптиг. Чамдыкта шору өзүп келген ажы-төл боттары кедип тургаш, шилип алыксаар апарган. Ынчангаш найысылалдан кады садыгланып ап чоруурлары база бар.
Чаа өөредилге чылының бүдүүзүнде эрттирип турар ярмарка чонга эптиг байдалды тургузуп турар. Бо айны төндүр ажылдаар, ынчангаш үүрмек хереглелдерни четчелеп алыр үе ам-даа бар.
Надежда КУУЛАР.
Авторнуң тырттырган чуруктары.
2025 чылдың август 28 “Шын” №33
