Февраль 18-те Тиилелге шөлүнге Тываның Чазааның Даргазының оралакчызы Тимур Кууларның эгелээшкини-биле ТШО-нуң киржикчилериниң чуруктарын болгаш маадырлыг чоруктарын бижээн плакаттарны Кызыл хоорайның пассажирлер аргыштырар автобустарынга байырлыг байдалга аскан.
«Шаңнал-макталдыг дайынчыларывысты чүгле дөргүл-төрели эвес, а бүгү тыва чон танып алзын дээш, плакаттар азар дугайында саналды ТШО-нуң киржикчилери киирген.
Автоколонна-17-ниң даргазы Айдың Отчурчапты дилээривиске, автобустарын белеткеп эккелди. Парлап белеткеп алган материалдарывысты автобустарда аскаш, чонче үндүрүп турарывыс бо.
55-ки гвардейжи мото-адыгжы бригаданың дайынчыларының чуруктарын астывыс. Чүгле автобустарга эвес, а өске-даа хөй-ниити черлеринге дайынчыларның чуруктарын болгаш маадырлыг чоруктарының дугайында бижиктерни азары планда көрдүнген» – деп, ТР-ниң Чазааның Даргазының оралакчызы Тимур Куулар чугаалады.
55-ки гвардейжи мото-адыгжы бригаданың типографиязының даргазы Артыш Очур-оол:
– Россияның аңгы-аңгы регионнарында өске-даа шериг кезээнден тускай шериг операциязында киржип турар чаңгыс чер чурттугларывыстың төрелдери, чоок улузу дайынчының ал-бодунуң болгаш маадырлыг чоруунуң дугайында материалдарны белеткээш, эккээр болза, плакат кылдыр чыскаап, электроннуг хевирге белеткеп бээр бис.
Хемчегге чуруун азып турар дайынчыларның төрелдери, чоок улузу база келген. Оларның бирээзи Леонтий Чыпсынак: «Дайын-чаада киржип турар оолдарывыска алдар-мактал! Чүгле амгы үеде дайылдажып турар оолдарның эвес, а аравыста чок маадырларывыстың чуруктарын азар болза, кончуг эки деп санаар мен. Чүгле автобустарга эвес, реклама азар щиттерге, хоорай, суур бүрүзүнге нептередири чугула.
Мээң оглум Чиңгис Чыпсынак офицер кижи. 2022 чылда чөрүлдээ эгелээрге-ле, дайынчы хөделиишкиннер девискээринче чорупкаш, бо хүнге чедир дайылдажып турар» – деп, ол чугаалады.
55-ки гвардейжи мото-адыгжы бригаданың үрер хөгжүм оркестри хемчегни байырлыг ёзу киирип ойнаан. Маадырларның чуруктарын аскан автобустар үрер хөгжүмнүң үделгези-биле ажылдаар «шугумунче» халдып үнүптү.
А. ОНДАР.
Буян ООРЖАКТЫҢ тырттырган чуруктары.
“Шын” №6 2025 чылдың февраль 20
