Тыва Республиканың найысылалында 55115 дугаарлыг шериг кезээниң шериг белеткел шөлүнге Тываның Баштыңының кубогу дээш ырак черден адар маргылдаалар болуп эрткен. Тыва Республиканың Чазааның, регионнуң Спорт яамызының, 55-ки аңгы гвардейжи мото-адыгжы бригаданың база Тыва Республиканың кара адар спортчу федерациязының деткимчези-биле бо хемчегни бир дугаар организастап эрттирген.
Хамаатыларның шериг-патриотчу кижизидилгези, часпас адарынга белеткелдиң деңнелин бедидери, ырак черден адар спортчу хевирлерни нептередири, ок-чепсекти айыыл чок ажыглаар культураны болгаш мергежилдерни сайзырадыры, амыдыралдың кадык овур-хевирин нептередири мөөрейниң сорулгазы болган.
100-тен 500 метр чедир ырак хемчээлдерге адар маргылдаалар киржикчилери туруп алгаш база шимчеп чорааш саазында болгаш демирде караларны атканнар. Оларга шыгаар болгаш эптиг кылдыр салыр чүүлдерни ажыглаарын чөпшээрээн. Бир караны адарынче эвээш дизе 3 минута, а шупту мергежилгелерже 15 хире минутаны аңгылаан.
Маргылдаа беш мергежилгеден тургустунган: «4 туз» (100 метр ырактан 45 секунда иштинде 4 ок), «Гонг» (200 метрден 60 секунда иштинде 6 ок), «Дииң караанче» (300 метрден 45 секунда иштинде 4 ок), «Чада» (300 метрден 30 секунда иштинде 3 ок) база 5-ки хевир (500 метрден 30 секунда иштинде 3 ок).
Кызылдан болгаш республиканың аңгы-аңгы булуңнарындан маргылдаага 100 ажыг адыгжылар киржип, “Легионер” (эгелеп чоруурлар) база “Кызыгаарлаашкын чоктар” (арга-дуржулгалыг киржикчилер) деп ийи бөлүкке чарган.
Арга-дуржулгалыг адыгжылар аразынга бирги черни Айбек Сандак-Доржу (95 балл), ийиги черни Ужар Сандый-оол (82 балл), үшкү черни Арат Каң-оол (77 балл), дөрткү черни Артыш Ховалыг (73 балл), бешки черни Арсений Ондар (67 балл) алган.
«Чаа эгелеп чоруур» бөлүкке бирги болгаш ийиги черлерни Меңги Малбай-оол биле Шораан Монгуш 69-69 дөмей саннар-биле доосканнар, үшкү черни Виталий Монгуш (61 балл), дөрткү черни Арсений Делгер (58 балл), бешки черни Эрес Улуг-Хува (47 балл) алганнар.
Спорт сайыды Субудай Монгуштуң дыңнатканы-биле алырга, мындыг маргылдааларны чылдың-на доктаамал эрттирери Тыва Республикада кара адар спорттуң хөгжүлдезинге идиглиг болгаш киржикчилерниң белеткелин бедидер.
А. МОНГУШ.
Чурукту ТР-ниң парлалга албанындан алган.
«Шын» №20 от 2025 чылдың май 29
