Август 15-те Республика хүнү Тыва Арат Республиканың тургузукчузу Буян-Бадыргы ноянның Кызыл хоорайда тураскаалынга мөгейиг болгаш дириг чечектер салыр байырлыг езулал-биле эгелээн.
Аңаа ТР-ниң Баштыңы Владислав Ховалыг, Тыва Республиканың Дээди Хуралының Даргазы Каң-оол Даваа болгаш өске-даа удуртукчулар, сайыттар киришкен. Байырлыг езулалга аңгы-аңгы албан черлериниң ажылдакчылары, хөй-ниитижилер, идепкейжилер дээш хөй кижи чыылган. Хемчегни ТР-ниң Баштыңы Владислав Ховалыг ажыткаш, чыылган чонга байырын чедирген.
“Бо байырлал Тываның күрүне болуп тургустунганын онзагайлавышаан, республиканың янзы-бүрү омак-сөөктүг чоннарын демниг болурунче кыйгырып турар. Төөгүвүс байлак. Аңаа чоргаарланып чоруур бис. Бо байырлалдың 2022 чылдың май 24-те үндезилеттинген Парламентаризм хүнү-биле дакпырлажып турары база анаа эвес. Чүге дээрге парламент дээрге-ле күрүнениң таваа азы дөзү болгай. Республиканың экономиктиг-даа, социал-даа хөгжүлдезинче угланган конституцияны, хоойлуларны парламент хүлээп ап турарын билир бис. Республиканың чурттакчы чонунга ийи дакпыр байырлал-биле байыр чедирип тур мен!” – деп, "Чаңгыс демниг Россия" партиязының идепкейжизи Людмила Осмоловская бодунуң бодалдарын илереткен.
Август 15-те Республика хүнү-биле чергелештир Парламентаризм хүнүн Тывага ийи чыл бурунгаар ТР-ниң Дээди Хуралының Даргазының саналы-биле демдеглеп эгелээн. Ол хүн Дээди Хурал бажыңынга ТР-ниң Дээди Хурал Даргазы Каң-оол Даваа, Күрүне Думазының депутады Айдың Сарыглар баштаан депутаттар аңгы-аңгы чылдарда күрүне удуртуп, политика, хөй-ниити ажылдарынга идепкейлиг киржип чораан хоочуннар-биле ужуражылганы эрттирген.
Ол хүн найысылалдың аңгы-аңгы девискээрлеринге Республика хүнүнге тураскааткан янзы-бүрү хемчеглерни организастаан.
Аныяктар сесерлиинге “Өг-бүлениң дыштаныр хүннери” деп хемчег болган. Бо чылын Өг-бүле чылында “Өг-бүлениң дыштаныр хүннери” деп төлевилелди ажылдап кылган. Хемчегниң кол сорулгазы – өг-бүлениң үнезин көдүрери база дыштаныр хүннерде сесерликке өг-бүлелерниң дыштанылгазын ажыктыг болгаш солун кылдыр организастаары. Ынчангаш аңгы-аңгы албан-черлери Аныяктар сесерлиинге янзы-бүрү ажыктыг шөлчүгештерни организастаан. Өөредиглиг кичээлдер болгаш мастер-класстарга чон сонуургалдыг киришкен.
В.С. Биче-оол аттыг «Хүреш» стадионунга 45 хардан өрү назылыг хоочун мөгелер аразынга хүреш маргылдаазы болуп эрткен. 40 дуржулгалыг болгаш алдар-аттыг мөгелер хүрешкеш, тыва оюннуң чараш аргаларын көргүскен. Оларның аразындан 51 хардан 55 харга чедир мөгелер аразынга Сүт-Хөл кожуундан Арзылаң мөге Вячеслав Монгуш шүүлген, а үжүүрлешкен мөге – Чөөн-Хемчик кожууннуң Начын мөгези Ушпас Куулар болган.
Республика хүнүнүң кежээзинде Тываның В. Көк-оол аттыг Национал хөгжүм-шии театрынга байырлыг хурал болган. 103 чыл бурунгаар тургустунган бот-догуннаан тыва күрүне ону албан езузу-биле хүлээп ап, бүгү талазы-биле деткээн хөй националдыг Россиядан быжыг деткимчени алган. Тыва Арат Республика бодунуң ээлчээнде Ада-чурттуң Улуг дайынының үезинде Совет Эвилелиниң баштайгы эвилелчизи болуп, чоннуң күзел-соруу-биле 80 чыл бурунгаар улуг чурттуң составынче кирген дээрзин Тываның Баштыңы демдеглээн.
Ооң соонда Россия Федерациязының база Тыва Республиканың күрүне шаңналдарын тыпсыр байырлыг езулал болган.
Россия Федерациязының Президентизиниң Чарлыы-биле «Ада-чурттуң мурнунга ачы-хавыяазы дээш» деп орденниң II чергезиниң медалын сумо тренери Кандемир Кууларга тывыскан.
Травматолог-ортопед эмчи Вячеслав Ондарны «Тыва Республиканың мурнунга ачы-хавыяазы дээш» Тыва Республиканың медалы-биле, төөгү эртемнериниң кандидады Алдын-оол Канзайны «Буян-Бадыргы» орденниң III чергези-биле шаңнаан.
Дараазында республиканың аңгы-аңгы адырларында ажылдап турар төлептиглерге үре-түңнелдиг күш-ажылы болгаш бедик мергежилдиг ажыл-херээ, республиканың хөгжүлдезинге киирген ачы-хавыяазы, хөй чылдарда ак сеткилдиг күш-ажылы дээш Тыва Республиканың күрүне шаңналдарын тывыскан.
Айдың ОНДАР.
"Шын" №62 2024 чылдың август 17
