Регионалдыг диспетчер албанының медээзи-биле, Тывада июнь 7-ниң эртенинде Чөөн-Хемчик, Бии-Хем болгаш Тожу кожууннарның девискээрлеринде 1340 га ниити шөлде 6 арга-арыг өрттери өөскүп турар. Өрт өөскүп турар черлерни өжүрери-биле, 69 кижини болгаш 3 техниканы хаара туткан.
Тыва Республиканың Арга-арыг ажыл-агый болгаш бойдус ажыглалының яамызының медээзи-биле алырга, алды өрттүң бежиниң өөскүп үнген чылдагааны – эрткен хонуктарда болган диңмирээшкин-кызаңнаашкыннар. Бии-Хем кожууннуң арга-арыг ажыл-агыйының девискээринде, Тарлаг сумузунуң мурнуу-барыын талазынче 156 км черде, үнген өрттүң чылдагааны кижилерниң хайындан болган.
2025 чылдың июль 2-ден 22-ге чедир республикага өртке удур онза байдалды чарлаанын сагындыраал. Онза байдал үезинде арга-арыгже хамаатылар болгаш транспорт аймааның кирерин кызыгаарлаан.
Республикага өрт айыылының сезонун чарлаандан бээр, март 31-ден, арга-арыг камгалалының талазы-биле инспекторлар аргалыг черлерже кирер 1878 эрттирилге бижикти долдурган. Өртке удур онза чурумнуң негелделерин хажытканын хынаары-биле, патруль ажылдарын чоруткан түңнелинде инспекторлар Россия Федерациязының административтиг кем-херек үүлгедиишкининиң дугайында Кодекизиниң 8.32 статьязы-биле 24 административтиг херектерни оттурган.
Республиканың девискээринге чыл эгезинден тура ниити девискээри 9 муң ажыг га 70 арга-арыг өрттерин өжүрген. Регионнуң Арга-арыг ажыл-агый яамызының курлавырында өрт айыылы-биле демисежир 209 кижи болгаш 126 техника бар.
А. СОЯН белеткээн.
Чурукту ТР-ниң Чазааның парлалга албанындан алган.
“Шын” №26 2025 чылдың июль 10