Тываның Баштыңы Владислав Ховалыг Россия хүнүн уткуштур чыылганнарга байырын чедирип, республиканың ажыл-ишчилеринге күрүне шаңналдарын тывыскан.
"Тыва боттуг федералдыг деткимчени албышаан, бодунуң хөгжүлдезин уламчылап турар. Чурттаар оран-сава тудуунуң улуг программазы ажылдап эгелей берген, оруктар туттунуп, чаа-чаа социал объектилер тургустунуп турар. Чоокку 3 чыл дургузунда 11 чаа школаны болгаш көдээ ажыл-агый продукциязын болбаазырадыр бүдүрүлгелерге чедир оон-даа өске хөй-ле чугула объектилерни тудар ужурлуг бис. Мурнувуста кылыр ажылдар-ла хөй.
Республиканың хөгжүлдезиниң үндезини – арга-дуржулгалыг профессионалдарның, чаа салгалдың специалистериниң, ажыл-ишчилерниң, көдээ ажыл-агыйлыгларның, бодунуң ажыл-ижинге бедик көдүрлүүшкүннүг ажылдап чоруурларның, чогаадыкчы аныяктарның күш-ажылы. Ниитизи-биле бодунуң чер-чуртунга ынак кижилерниң ажыл-ижинден хамааржыр" – деп, Тываның Баштыңы чугаалаан.
Шериг хүлээлгезин күүседип тургаш, көргүскен эрес-дидим чоруу дээш “Эрес-дидим чорук” ордени-биле, ол ышкаш “Дайынчы ачы-хавыяазы дээш” РФ-тиң Камгалал яамызының медалын сержант Вадим Чыкай алган. “Эрес-дидим чоруу дээш” деп медаль-биле биче сержант Чиңгис-Хаан Чаш-оолду, ефрейтор Адыгжы Монгушту шаңнаан. Старшина Мерген Седипке Жуковтуң медалын тывыскан.
Хөй чылдарда ак сеткилдиг ажылы дээш Тыва Республиканың Баштыңының Өөрүп четтириишкин бижии-биле “Эдегей” танцы болгаш костюм театрының чиңгине директору Кима Донгакты шаңнаан. Шак-ла ындыг бижикти “Тывахарылзааинформ” акционерлиг ниитилелдиң телефон болгаш телеграф четкизиниң эксплуатация албанының даргазы Анвар Кильдияровту бедик мергежилдии, Тыва Республиканың харылзаазының хөгжүлдезинге киирген улуг үлүг-хуузу болгаш хөй чылдарда ак сеткилдиг ажылы дээш тывыскан. Дээди өөредилге адырынга хөй чылдарда ак сеткилдиг ажылы дээш ТывКУ-нуң даштыкы дылдар кафедразының доцентизи Елена Байкалованы, албан-хүлээлгезин ак сеткилдиг, үлегерлиг күүсеткени дээш полицияның майору Саян Ондарны, полицияның капитаны Вадим Хертекти, өөредилге адырынга хөй чылдарда ак сеткилдиг ажылы дээш Светлана Черкашина оларны база ТР-ниң Баштыңының Өөрүп четтириишкин бижии-биле шаңнаан.
Тыва Республиканың Баштыңының хүндүлел бижиктерин Пенсия болгаш социал камгаладылга фондузунуң пенсия болгаш социал төлевирлер доктаадыр килдистиң даргазының оралакчызы Саяна Сааяны, “Тыва авиация шугуму” авиакомпанияның техниги Олег Кара-Доңгакка тывыскан. “ТР-ниң алдарлыг тренери” деп хүндүлүг атты ТывКУ-нуң күш-культура болгаш спорт кафедразының улуг башкызы Болат Шагжы алган. “ТР-ниң алдарлыг ажылдакчызы” деп аттарга тудуг адырының хоочуну Валентина Илларионова, күш-ажылдың хоочуну Дадар-оол Кыргыс олар төлептиг болганнар. “ТР-ниң өөредилгезиниң алдарлыг ажылдакчызы” деп атты Кызылдың 3 дугаар школазының орус дыл болгаш чогаал башкызы Зоя Баир алыр аас-кежиктиг болган. “ТР-ниң алдарлыг эмчизи” Ольга Тыкыл-оол болган.
“ТР-ниң улустуң башкызы” деп хүндүлүг аттарны өөредилге адырының хоочуннары Мария Белоусова, Светлана Бирилей, “ТР-ниң улустуң артизи” деп атты Леонид Каң-оол алганнар. Муниципалдар албанының хоочуну Владимир Еромаев, күш-ажылдың хоочуну Макар Донгак олар “Тыва Республиканың “Шылгараңгай ажылы дээш” деп медальдар-биле шаңнатканнар. “Буян-Бадыргы” ордениниң III чергезин Кызылдың 9 дугаар гимназиязының методизи Валентина Дөмүр-оол болгаш тудуг адырының хоочуну Анатолий Монгуш алганнар. ТР-ниң Адалар чөвүлелиниң даргазы Хонук-оол Монгуш “Тыва Республиканың ордени-биле” шаңнаткан.
Шаңналдар тыпсыр ёзулал соонда республиканың төлептиг ажыл-ишчилери Тываның Баштыңы-биле ниити чурукка тырттырышканнар.
/ Чыжыргана СААЯ.
Буян ООРЖАКТЫҢ тырттырган чуруктары.
"Шын" №42 2023 чылдың июнь 10
