Апрель 29-та Тываның Чазак бажыңынга Тываның Баштыңы Владислав Ховалыгның удуртулгазы-биле республиканың Күрүне Чөвүлелиниң хуралы болуп эрткен. Хемчегни республиканың ниитилелиниң амыдырал-чуртталгазынга хамаарышкан элээн каш айтырыгларга тураскаадып байырлыг байдалга эрттирген.
Хуралды ТР-ниң Чазааның Баштыңының Администрациязының болгаш ТР-ниң Чазааның Аппарадының удуртукчузу Юрий Ананьин ажыткаш, хуралга шиитпирлер хүлээп алыр кворумну хандырып турар республиканың Күрүне Чөвүлелиниң база Президиумунуң 44 кежигүнү киржип турарын дыңнаткан.
Тываның Баштыңы чаа кадрлар томуйлаашкынын база халаашкынын чарлаан. Күрүне чөвүлелинче республика чергелиг 3 удуртукчу кирген. Оларга Чөвүлелдиң кежигүнүнүң демдектерин тывыскан. Күрчөвүлелдиң составынче Чеди-Хөл кожууннуң Төлээлекчилер хуралының даргазы база баштыңы Мерген Сат, Чөөн-Хемчик кожууннуң чагырга даргазы Айдыс Куулар, Эрзин кожууннуң чагырга даргазы Салим Кызыл-оол олар кирген. Хуралдың бир кол кезээ Россия Федерациязының болгаш Тыва Республиканың күрүне шаңналдарын тыпсыр ёзулал болган.
Тываның Баштыңы Владислав Ховалыг шаңналдар тыпсыр ёзулалды ажыдып тура, боттарының девискээриниң амыдыралын экижидеринге муниципалдыг бот-башкарылга органнары кол рольду ойнап турар дээрзин демдеглээн. Ол ышкаш Тиилелгениң 80 чылдаанының байырлалының бүдүүзүнде шупту күрүне эрге-чагырга деңнелинге, чурттакчы чоннуң эң-не хөй киржилгелиг, шынарлыг хемчегни эрттиреринге улуг күжениишкинни салыр сорулга салдынган.
“Ада-чурт камгалакчызының чылында амы-тынындан чарылган шериг албаныгларга болгаш тускай шериг операциязының киржикчилеринге сактыышкынның хүндүткел ёзузун көргүзери эвээш эвес ужур-уткалыг. Амыдырал-хандырылга, корум-чурум харыылап турар бүгү-ле албан черлериниң болгаш хөй-ниити организацияларының, волонтерларның белеткелин хандырары чугула. Шыңгыы болгаш чымыштыг ажыл бисти манап турар” – деп, Тываның Баштыңы Владислав Ховалыг демдеглээн.
Улаштыр шаңналдар тыпсыр байырлыг ёзулал болган. РФ-тиң Президентизиниң өөрүп четтириишкин бижиин ТР-ниң Баштыңының Чагыргазының болгаш Чазааның Аппарадының иштики политика талазы-биле департаментизиниң даргазы Шолбан Хомушкуга тывыскан. РФ-тиң Президентизиниң Хүндүлел бижии-биле Идегел Туматты шаңнаан. “Ада-чурттуң мурнунга ачы-хавыяазы дээш” орденниң медалының II чергезин ТР-ниң Кызыл хоорайның Төлээлекчилер хуралының даргазының оралакчызы Аяс Лопсан алган. Ол ышкаш өске-даа шаңналдарны база тус-тузунда тывыскан.
Чөвүлел хуралга эң-не чедиишкинниг чагырга черлерин тодарадырынче угланган “Тыва Республиканың тергиин кожууну” деп атка республика чергелиг мөөрейниң дугайында база чугаалашкан.
Бистиң корр.
Буян ООРЖАКТЫҢ тырттырган чуруу.
«Шын» №16 2025 чылдың май 1