«Кайгамчыктыг ужуражылгалар» деп Баштайгыларның шимчээшкини бүгү-российжи төлевилел-биле Кызыл хоорайның орук-транспорт техникумунуң сургуулдары Россияның алдарлыг башкызы, Кызыл хоорайның 1 дугаар школазының директору Татьяна Шарыпова-биле ужурашкан. Ук ужуражылга техникумга болгаш ооң сургуулдарынга онзагай болуушкун болган. Шак ындыг ужуражылгалар сургуулдарга тура-сорукту киирип, келир үеде бодунуң оруун тып алырынга дузалаар дээрзин демдеглээри чугула.
Татьяна Шарыпова бодунуң студентилеп чораан үелериниң, мергежил шилилгезиниң болгаш ажылының дугайында чугаалаан соонда, ужуражылга айтырыг-харыы хевиринче шилчий берген. Билдингир башкыга сургуулдар сургуулдар сонуургаан айтырыгларын салыр аргалыг болган.
Татьяна Леонидовнаның мергежилинге бердингенин болгаш ажылынга ынаан уруглар эскерген. Башкы мергежил кандыг-даа кижиниң келир үезиниң тодарадыкчызы. Аңгы-аңгы адырларга ажылдаар, эртем-билиглиг тускай специалистерни олар өстүрүп, кижизидип чоруур. Башкының бердинген ажылының, өөреникчилеринге ынакшылының ачызында бергелерни ажып эртип, чедиишкинниг чурттап чоруур бис.
«Техникумну доозуптарывыска, бисти чүү манап турарын билип алыры биске кончуг чугула. Шак мындыг ужуражылгалар кижи бүрүзүнүң амыдыралда шын оруун тып алырынга ажыктыг. Чаа-чаа чүүлдерни билип алгаш, тура-соруувус көдүрлү бээр» – деп, дөрткү курстуң сургуулу Дарыймаа Тумат чугаалаан.
«Ооң мурнунда шак мындыг ужуражылгалар чүгле школаларга болуп турган. А ам техникумда база организастап эгелээнин эки деп көрүп тур мен. Эрткен оруу байлак, чедиишкинниг улус-биле ужуражырга, сургуулдарга солун болгаш ажыктыг. Моон соңгаар база шак мындыг ужуражылгалар болур дээрзинге идегеп тур мен» – деп, Кызылдың орук-транспорт техникумунуң директорунуң оралакчызы Хандымаа Шагдыр чугаалаан.
Бистиң корр.
Ада Тюлюштуң тырттырган чуруктары.
