Сентябрь 12-де Кызылдың солагай талакы дачаларында хоорайның 18 дугаар школазының эге класс өөреникчилери дигии-биле хораннанган. Ук байдалды ТР-ниң Өөредилге яамызы болгаш Росхереглелхайгааралдың Тыва Республика талазы-биле албан чери хыналдага алган.
Росхереглелхайгааралдың эпидемиологтуг хыналда килдизиниң даргазы Аляна Дажикайның дыңнатканы-биле алырга, албан черинге 18 кижи энтеровирустуг инфекциядан аараан деп медээ келген. Оларның 17-зи өөреникчилер, бирээзи – башкы. Бөгүн эмчилерниң хайгааралында 6 кижи бар.
«Медээ келирге-ле, эпидемиологтуг шинчилелди школада Росхереглелхайгааралдың ажылдакчылары чорудуп эгелээн. Чем кылыр черниң-даа, сакпың-саваның-даа, ажылдакчыларның-даа, аарый берген уругларның-даа анализтерин алган» – деп, Аляна Дажикай чугаалаан.
Энтеровирустуг инфекцияның тараар чылдагааннары аңгы-аңгы. Чем кылыр черни чогуур деңнелге аштап-арыглавазы, ниити арыг-силигни сагывайн баары азы бир-ле кижи өскээртен инфекцияны чыпшырып эккеп база болур дээрзин Аляна Дажикай сагындырган. Инфекция кайыын эгелээнин тодарадыр ажылдарны чорудуп турар. Амдыызында кайыын, канчаар эгелээнин чугаалаары болдунмас. 18 дугаар школаның өөреникчилери онлайн хевирге бажыңындан өөренир дугайында шиитпирни ук албан чери үндүрген.
18 дугаар школаның эге класс өөреникчилерин изиг чем-биле хандырып турган хууда сайгарлыкчыны база хынап эгелээн.
Кызыл хоорайның халдавырлыг аарыглар эмнелгезинде чыдар уругларның кадыының байдалынга хамаарыштыр эпидемиолог эмчи Буяна Моңгуш тайылбырны берген:
– Эмнелгеде чыдар уругларның байдалы чүгээр, ажырбас. Школачыларның эъди изип, кузуп, куду олуртуп турар. Анализтерни алгаш, лабораторияже чорудупкан. Харыызы кээрге, аарыгның чылдагааны тодараар.
Сөөлгү болуушкуннарга үндезилээш, ТР-ниң Баштыңы Владислав Ховалыг Тываның шупту школаларын изиг чем-биле хандырып турар сайгарлыкчыларны хынаар даалганы берген.
Айдың ОНДАР.
Буян ООРЖАКТЫҢ тырттырган чуруу.
"Шын" №70 2023 чылдың сентябрь 16