Чайгы дыштанылга эгелээн. Тываның стационар лагерьлеринде бо хүннерде 7500 уруг хаара туттунган. Бир дугаар сменада 20 лагерьниң эжии уруглар, оолдарга ажыттынары планда көрдүнген турган. Ынчалза-даа планда көрдүнген 20 лагерьниң чүгле 8-и ажыттынган.
Айыткан хуусаада чайгы лагерьлерниң ажыттынмаан чылдагаанынга хамаарыштыр Росхереглелхайгааралдың Тыва Республикада эргелелиниң удуртукчузу Людмила Салчак тайылбырны берген:
«20 лагерьниң чүгле 8-и ажыттынган. Арткан лагерьлер чогуур хемчеглерни чедир чорутпаан болганындан санитар-эпидемиологтуг хыналданы ам-даа эртпээн. Объектилерже үнүүшкүннер уламчылап турар. Бо хүннерде Мөңгүн-Тайгада 2, Тожуда 1 болгаш Чөөн-Хемчик, Каа-Хем, Улуг-Хем кожууннарның стационар лагерьлери ажылын эгелей берген. Үстүнде ады кирген лагерьлер хыналданы чогуур үе-шаанда эрткеш, санитар-эпидемиологтуг хыналданы алгаш, ажылдай бергени ол.
Бо удаада санитар-эпидемиологтуг чөпшээрел бээринге лагерьлерниң ажылдакчыларының эмчи шинчилгезин чедир эртип албааны болуп турар. Хыналда үезинде 17 ажылдакчыга ажылдаар эргени бербээн бис. Чүге дээрге оларның анализинде инфекция бар болган. Амгы үеде Таңды биле Тес-Хем кожууннарның лагерьлеринде хыналда чоруп турар».
Июнь 20-ге чедир бо айтырыг шиитпирлеттинер дээрзин Людмила Салчак демдеглээн.
ТМГ-ниң медээзинден.
“Шын” № 45 2024 чылдың июнь 19
