"Роснефть” компания Тыва Республиканың найысылалы Кызыл хоорайда “Тараа" форматтыг хөй ажыл-чорудулгалыг автозаправка комплекизин ажыткан. Комплекс амгы үениң дериг-херекселдери-биле дериттинген, бир хонукта муң хире автомобильдерге АИ-92 биле АИ-95 маркаларның бензинин, а ол ышкаш «Евро-5» стандарттың дизель кывар чүүлдү кудуп берип турар.
Чаа автозаправка комплекизин Тиилелгениң 75 чыл ою кудумчуда туткан. Объектиниң эптиг туружу клиентилерге аъш-чем болгаш «Тараа» деп брендилиг садыг болгаш кафе комплекизи дүн-хүн чок ажылдап, Кызыл хоорайның чурттакчыларынга болгаш аалчыларынга кайы-даа үеде автомобильдерге кывар-чаар чүүлдер кудуп алыр, чемненир база орукка ап чоруур янзы-бүрү барааннар садып алыр ачы-дузаны чедирип турар. Чаа автозаправка комплекизин функционалдыг зоналарга чарган, ол клиентилерге дүрген ачы-дуза чедирериниң эптиин, бедик байдалын тургускан. Чурагайлыг сервистер, ооң иштинде «РОСНЕФТЬ АЗС» деп мобильдиг капсырылга кирип, янзы-бүрү аргалар-биле дуза чедирер, ол дээш ырактан төлээр арганы берген.
«Роснефть» компания РФ-тиң 62 регионунда “Тараа" форматтыг хөй ажыл-чорудулгалыг автозаправка комплекстерин ажыткан. Хөй ажыл-чорудулгалыг, амгы үениң автозаправка станцияларын сайзырадыры «Роснефтиң” үүрмектеп садар бизнезин мурнады боттандырар аргазы апарган. Хакасияның болгаш Тываның рыногунга «Роснефть” компанияны “Хакаснефтепродукт ВНК” Акционерлиг ниитилел төлээлээр деп “Хакаснефтепродукт” ААН-ның директору Евгений Перцухов автозаправка комплекизиниң ажыдыышкынының үезинде чугаалаан.
“Роснефть” компанияның үүрмектеп садар четкизи Россия Федерациязының девискээринде бензин кудар станциялар комплекстериниң саны-биле эң-не хөй. Россияның 62 регионунда 3 000 хире станциялар бар.
“Южный 171” станцияның байырлыг ажыдыышкынынга республиканың экономиктиг хөгжүлде болгаш үлетпүр сайыды Аяс Баян “Роснефть” нефть компаниязының бензин кудар станциялары Тывага туттунуп эгелээни регионнуң экономиктиг хөгжүлдезинге болгаш “дугуйлар кырында” республиканың чурттакчы чонунуң социал байдалынга эки салдарлыг болуп, кывар-чаар чүүлдерниң өртээниң өрүлевезинге салдар боор дээрзин демдеглээн.
ТР-ниң энергетика болгаш одаар чүүл сайыды Эдуард Куулар:
— Бо объектини ажыглалга кииргени — Тываның Баштыңы Владислав Ховалыг 2021 чылда “Роснефть” нефть компанияның удуртулгазы-биле бистиң республикага бензин кудар станцияларны тудар талазы-биле дугуржулганы чедип алганының боттаныышкыны. “Роснефть” нефть компанияның бензин кудар станциялары республикага моон соңгаар-даа туттунуп, ажыглалга кирер – деп чугаалаан.
Ол ышкаш сайыт Эдуард Куулар чаа АЗС-тиң чүгле чолаачыларга эвес, а ниитизи-биле регионнуң инфраструктура болгаш одалга рыногун сайзырадырынга ужур-дузалыын демдеглээн.
“Роснефть” четкизинде “Өг-бүле командазы” деп программа ажылдап турар. Ооң ачызында программаның киржикчилеринге апрель төнчүзүнге чедир кывар-чаар чүүлдер садып алырынга чиигелделерни бээр. Оон аңгыда, “БАЗА” программаның киржикчилери санажылга үезинде бонус баллдарын чыып ап болур. Чыгдынган баллдарны «Роснефть» үүрмектеп садар четкиде кывар-чаар чүүл, садыгларда болгаш кафелерде барааннар төлээринге ажыглап болур.
Компания амгы үениң чурагайлыг технологияларны шиңгээдип, клиентилерге дүрген болгаш эптиг хандырарынга янзы-бүрү хевирлерни калбартып турар.
Ш. МОНГУШ белеткээн.
Ада ТЮЛЮШТУҢ тырттырган чуруктары.
«Шын» №12 2025 чылдың апрель 3
