Холокост дугайында сактыышкын
холокост дугайында сактыышкынче Россия улуг кичээнгейни салып турар, чүге дизе ооң девискээринге нацизмниң чедирген кемниг үүлгедиглери уттундурбас. Ол дугайында еврей общинаның төлээлери-биле ужуражылга үезинде Россияның Президентизи Владимир Путин демдеглээн.
«Россияда бо Сактыышкын хүнүнге онза кичээнгейни салып турарын демдеглексээр-дир мен. Чүге дизе ол үеде болган хай-халапты сактып чоруур бис, бистиң чуртувуска нацизм чүнү кылган-дыр — 1 сая ажыг совет, российжи еврейлер ол кем-херек үүлгедиглеринден когараан» — деп, Президент сагындырган.
Ол хүннерде «Россияның еврейлер общиназы» Холокостка когарааннарга тураскааткан бүдүн серия хемчеглерни эрттирип турарын В. Путин кичээнгейге алган. «Ол хемчеглерде дыка хөй кижилер киржип турар, ооң-биле кады аңгы-аңгы национал чоннар» — деп, чурттуң Баштыңы демдеглээн.
13 российжи спортчу киржир
2026 чылда Италияга болур кышкы Олимпий оюннарынга 13 российжи спортчу киржир. Ол дугайында ТАСС-ка Россияның чыынды командаларының спортчу белеткелдерин чорудар төптүң парлалга албаны дыңнаткан.
Олимпий оюннарынга фигуристер Аделия Петросян биле Петр Гуменник, шорт-трек ойнакчылары Алёна Крылова биле Иван Посашков, хаакчылар Дарья Непряева биле Савелий Коростелёв, конькижилер Ксения Коржова биле Анастасия Семёнова, ски-альпинист Никита Филиппов, шанакка чуңгулаар Дарья Олесик биле Павел Репилов, ол ышкаш даг хаакчылары Семен Ефимов биле Юлия Плешкова.
2026 чылда кышкы Олимпий оюннары Миланга база Кортина-д,Ампеццога февраль 6-дан 22-ге чедир болур. Российжи спортчулар аңаа нейтралдыг эрге-байдалга киржир.
Улуг хар чагган дээш
Улуг хар чагганы онза байдал болганда, ажылынга азы өөредилгезинге озалдаанын чөптүг чылдагаан кылдыр санап, ону РФ-тиң Күш-ажыл кодекизинче киирип болур дээн бодунуң саналын ТАСС-ка РФ-тиң Хөй-ниити палатазының секретары Владислав Гриб илереткен.
«Улуг хар чагганы ажылдакчының ажылынче озалдаанының чөпчүг чылдагааны бооп болур. Ол хүн ийи шактан көвей эвес озалдааны чөптүг чылдагаан бооп болур, ынчангаш ону Күш-ажыл кодекизинче киирип ап болур» — деп, В. Гриб чугаалаан.
Ооң чугаазы-биле алырга, ОБЯ-ның тарадып турар дыңнадыглары онза байдалды шынзыдып болур.
Бо хүннерде Москва хоорайда каш хонук улай улуг хар чаап турар. Найысылалдың синоптиктериниң медээлери-биле алырга, кезек черлерде хөртүктерниң бедии 60 см, нормадан ийи катап улуг.
Красноярск край — лидер
Красноярск край аныяктар политиказын боттандырар лидерлерниң бирээзи болган. «Регион аныяктарга» деп мөөрейге тиилелгелериниң ачызында инфраструктуразының чаартылгазынче 412 сая рубльди алган дээрзин регионнуң губернатору Михаил Котюков РФ-тиң Чазак Даргазының оралакчызы Дмитрий Чернышенко-биле ужуражылга үезинде дыңнаткан.
«Красноярск край спортту чедиишкинниг сайзырадып турар. Чылдың-на регионга 7 муң ажыг күш-культура болгаш спортчу хемчеглер эртип турар. Массалыг спортту хөгжүдеринге дузалаар 9 муң ажыг спортчу объектилер ажылдап турар. Чыл санында Красноярск российжи болгаш делегей чергелиг улуг спортчу болуушкуннарның төвү апарган. Ында амгы үениң спортчу объектилери бар, кандыг-даа улуг хемчеглерни организастаарынга улуг арга-дуржулга база бар» — деп, регионнуң губернатору демдеглээн.
Сөөлгү чылдарда Красноярск крайга 27 муниципалдыг аныяктар төптерин чаарткан, 2025 чылда 5 ындыг төпке капиталдыг септелгелерни кылган. 2025 чылда «Аныяктар болгаш уруглар» национал төлевилел-биле 25 школаны септээн, ол ышкаш 4 чаа школа ажыттынган. Крайның эртем болгаш өөредилге албан черлеринде 24 аныяктар лабораториялары ажылдап турар. 2025 чылда 71 шинчилел төлевилелдери ажылдап эгелээн.
/ ТАСС-тың медээлеринден А. СОЯН белеткээн.
Чуруктарны интернеттен хоолгалаан.
“Шын” №4 2026 чылдың февраль 5