Эрткен хүннерде Россияның Президентизи Владимир Путинге баштаткан делегация Кыдатче ажыл-агыйжы сургакчылаашкынны кылган. Удур-дедир чугаалажыышкыннар үезинде Владимир Путин Россия биле Кыдатка 2024–2025 чылдарда Культура чылдарын эрттирерин чарлаан.
Май 16-да Кыдаттың Улуг театрынга Россия биле Кыдатта Культура чылының байырлыг ажыдыышкыны болуп эрткен. Аңаа тураскааткан солун концертке Н.П. Осипов аттыг Национал академиктиг улустуң хөгжүм херекселдериниң оркестри биле Кыдаттың Төп оркестри солун оюн-көргүзүүн чонга бараалгаткан.
Россия биле Кыдатта эртип турар Культура чылдарынга тураскааткан Кыдаттың 51 база Россияның 38 хоорайынга 230 ажыг культурлуг хемчеглерни уран чүүлдүң аңгы-аңгы хевирлеринге эрттирери көрдүнген.
Шак ындыг Культура чылы Россияның болгаш Кыдаттың чоннарының аразынга эп-найыралды быжыктырарынга, ийи чурттуң культурлуг өнчүзү-биле таныжып, ийи таланың культура адырынга удур-дедир кады ажылдажылганы чорударынга, аңгы-аңгы солун төлевилелдерни боттандырарынга кончуг ажыктыг болуп турар.
«Шын» №36 2024 чылдың май 18
