Тываның Баштыңы Владислав Ховалыг Новосибирск хоорайда делегейниң XI Сибирь транспорт шуулганында киржип турар.
Шуулганның ажылы биле «Сибирь дугуржулгазы» регионнар аразының ассоциациязының (МАСС) координация чөвүлелиниң хуралын Владислав Ховалыг удуртуп эрттирген. Чөвүлелдиң сайгарган кол темазының бирээзи – Тываны таварты эртер чурттар аразы-ның транспорт коридору.
МАСС Азияның делегей маршруттарының четкизинче «Красноярск – Абакан – Хандагайты – Моол – Кыдат» автомобиль оруун киирер дээнин деткээн деп, Тываның Баштыңы социал четкилерде бодунуң блогунда дыңнаткан. «Россияның Кыдатче угланган амгы ажыл-агыйжы болгаш геополитиктиг байдалын тода көргүзүп турар – деп, Владислав Ховалыг тайылбырлаан. – Ам төлевилелди Россия–Моол–Кыдат чазактар аразының транспорт болгаш логистика адырының талазы-биле комиссиязынга сайгарып көөр кылдыр киирери чугула».
Тыва Республиканы таварты чаа автомобиль, демир-орук болгаш авиа-угланыышкыннарлыг «Россия – Моол– Кыдат» чурттар аразының коридорун тургузар дээн бистиң регионнуң үжен хире өске-даа хемчеглери 2035 чылга чедир Сибирь федералдыг округтуң регионнарын хөгжүдер Стратегияже киргенин сагындыраал. Чурттар аразының чаа коридору чурттуң өске транспорт оруктарының чүъгүн эвээжедип, а Тывага сайгарлыкчы чорукту оон-даа идепкейжидер.
Координация чөвүлелиниң хуралынга «Красноярск – Курагино – Кызыл – Цаган-Толгой – Урумчи» демир-орук адырын тудар төлевилелди база тодаргай сайгарган. МАСС республиканың ол төлевилелин база деткээн.
«Россияның Президентизи Владимир Путинниң саналдааны Төп-Евразия транспорт коридорун хөгжүдер төлевилелдиң кедизи улуг» — деп, Владислав Ховалыг ТАСС-ка интервьюзунда демдеглээн. Ол ышкаш төлевилелче 1 трлн хире рубль хемчээлдиг инвестиция салдынарын, ооң боттанылгазынга 40 муң чаа ажылчын олуттар тургустунарын Тываның удуртукчузу дыңнаткан. «Чылда-ла ол шугумнап 40 сая тонна чүъктү аай-дедир сөөртүр» — деп чугаалаан.
Делегейниң Сибирь транспорт шуулганы ажылын үш хонук уламчылаар. Беш муң ажыг аалчылар, 50 хире организацияларның төлээлери ында киржип турар. Шуулганның киржикчилери транспорт-логистика инфраструктуразының, ужудукчу чокка ужар системаның база чурагай инновациязының, орук тудуг перспективаларының, транспортка айыыл чок чоруктуң, иштики суг транспортунуң, авиация үлетпүрүн хөгжүдер дээш, оон-даа өске айтырыгларны сайгарар.
А. МОНГУШ.
Чуруктарны интернеттен алган.
«Шын» №46 2024 чылдың июнь 22
![](https://sun4-20.userapi.com/impf/24Ywp0DUdRv_Yr19FZzCCyXHKhHBzyQ-i3BcbQ/HL3IKscXxnY.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x426,720x480,1080x720,1280x853&sign=cb434edfdb9ce1fef942a3f57e19ff62&from=bu&u=es4H_vRSsY_k_qdr46CmD5nvF55j7HwBmmEE4pPaWno&cs=807x538)
![](https://sun4-19.userapi.com/impf/UL00HUVg-pSZ3K_lURi2dCrlymJcUG2R7XDjFQ/ovoxYuXqEok.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x426,720x480,1080x720,1280x853&sign=5ac990712dedc982381be391bdec5b1d&from=bu&u=kjnh6_AXUzQd63lXBiVKsm7m0-UU3r74s58fUq-We-I&cs=807x538)
![](https://sun4-17.userapi.com/impf/i18MqHnm2lAuFRy94WYzWuW0WPJ1gtqoxNFUIQ/ZDjELKPA830.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x426,720x480,1080x720,1280x853&sign=0bc4c45784cf82c5d6ea668d68c455da&from=bu&u=JV8StzOZBwahLGwSsl5dX43zgpjS0EvrDRvztR8e7ys&cs=807x538)
![](https://sun4-22.userapi.com/impf/R5PeGpXjRFQJlyq85ChSb9UEtiFz-zTPYt-B4w/y-BD43O0YgE.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x426,720x480,1080x720,1280x853&sign=ee3103ec0b649f1bcd6b48727b678a5e&from=bu&u=fBzSGCJcfVCndsIwoXkpQqBGw6U4V-3Jblva7TY2Aik&cs=807x538)
![](https://sun4-19.userapi.com/impf/fVAyup1_Wud7RhRwghzOzWd5ZXDAyAvqWaI1Iw/ZodNEsZxaIU.jpg?quality=95&as=32x21,48x32,72x48,108x72,160x107,240x160,360x240,480x320,540x360,640x426,720x480,1080x720,1280x853&sign=f2a394cd7e454ebb9ae0a6b52736ea4b&from=bu&u=TM1klihNtlXvkheoVjXNNhtPERGJNOXKp5EnLQKEDTE&cs=807x538)