Шенелделерге белеткенир
РФ-тиң Айыыл чок чоруунуң чөвүлелиниң ээлчеглиг хуралының үезинде Россияның камгалал сайыды Андрей Белоусов ядролуг чепсектиң шенелделеринге белеткенирин саналдаан. Американың Каттышкан Штаттары ракеталарны Европада болгаш Азия-Оожум океан девискээринде тургузуп эгелээни, Германияның девискээринде ракеталар Россияның төп черлеринге 6–7 минута дургузунда ужуп кээп болуру-биле сайыт бодунуң ол саналын тайылбырлаан. Агаарга камгалалдың “Алдын көжеге” деп чаа системазын Америка тургузуп турарын, ол система Россияның болгаш Кыдаттың ракеталарын оларның турар черинге-ле чок кылып каап болур арга-хоргалыын А. Белоусов Айыыл чок чоруктуң чөвүлелинге дыңнадып, Россияже ядролуг ракеталарлыг халдаарының шериг өөредилгелерин октябрь айда эрттиргенин ол сагындырган.
Россияның Чепсектиг Күштериниң ядролуг чепсектериниң шенелделерин эрттиреринге хамаарыштыр саналдарны Айыыл чок чоруктуң чөвүлелинге киирерин Камгалал биле Иштики херектер яамыларынга, тускай сорулгалыг албан черлеринге дааскан. Ындыг даалганы берип тура, Американың Каттышкан Штаттары болгаш өске-даа ядролуг чепсектиг күрүнелер ындыг шенелделерни чорудар болза, ынчан Россия бодунуң ядролуг чепсектериниң шериг-өөредиглиг шенелделерин эгелээр дээрзин Президент Владимир Путин демдеглээн.
Россияны сандарадырын болдурбас
Коллективтиг барыын күрүнелер Россияны он-он аңгы бичии күрүнелерге тарадыр сандараткаш, биче чоннарны боттарының ажык-дүжүүнге ажыглаар сорулгалыын Россияның Айыыл чок чорук чөвүлелиниң секретары Сергей Шойгу «Аргументы и факты» сеткүүлге статьязынга бижээн.
“Россияның болгаш СНГ чурттарының улустарының эп-найыралынче шаанчакты киир шаап, бистиң төөгүвүстү, культуравысты болгаш ёзу-чаңчылдарывысты буурадыр сорулгалыг пропагандисчи күштүг халдаашкыннарны кылып турар. Амгы үеде Россияның мурнунда кол сорулга — улустарның эп-найыралын улам быжыглаары” деп бодунуң чүүлүнде ол айыткан.
Соңгулдаларга шаптыктаар
2026 чылда болур Россия Федерациязының Күрүне Думазының соңгулдаларынга Украинада тускай шериг операциязының киржикчилериниң аразындан кандидаттарның ат-алдарын кудуладыр хемчеглерни ап чорударын даштыкы күрүнелерде белеткеп турарының дугайында Думаның ажыл-чорудулгазынга даштыкыдан киржилгелерниң истелгезиниң талазы-биле комиссияның удуртукчузу Василий Пискарёв дыңнаткан. Россиядан дезип үнген саттыныкчы агентилер, Европа парламентизиниң депутаттары, чурттар аразының парламент организациязы Европа чөвүлелиниң ассамблеязының төлээлери чыылган, Брюссельге эрткен конференцияның резолюциязынга ол хемчеглерни быжыглаан деп политик депутат чугаалаан.
Террористи туткан
Тускай шериг операциязының киржикчилериниң дугайында медээлерни Украинаның шериг разведказының ажылдакчызы блогерге дамчыдып берип турган Тамбов областың чурттакчызын Россияның Айыыл чок чорук албанының оперативтиг ажылдакчылары туткан.
Айыыл чок чоруктуң федералдыг албанының дыңнатканы-биле алырга, Тамбовтуң чурттакчызы боду украин блогер-биле харылзааже үнгеш, тускай шериг операциязының девискээринде российжи шериг кезектериниң болгаш оларның командирлериниң дугайында дамчыдып берип турган. Оон аңгыда Украинаның тускай сорулгалыг черлери-биле харылзаалыг, Россияның девискээринде террорисчи организацияларга акша берип турган.
Күрүнеге өскерликчи чорукка болгаш терроризмге Тамбовтуң чурттакчызын буруудадып, истелгени эгелээн.
Бүдүрүкчүлүү өзер
Чоокку 5 чылдарда Россияга ажылдың бүдүрүкчүлүү ортумаа-биле 2,5 хууга өзерин “Бүдүрүкчү чорук 360” VII Федералдыг шуулганга РФ-тиң Экономиктиг хөгжүлде яамызының удуртукчузу Максим Решетников дыңнаткан. Сөөлгү 7 чылда чуртка ажылдың бүдүрүкчүлүү ортумаа-биле 8,2 хуу, 2023–2024 чылдарда Россияга экономиканың хөгжүлдези улам дүргедээн, ажылдың бүдүрүкчүлүү 2,5−2,7 хуу болган. Ынчангаш чоокку 5 чылдарда ажылдың бүдүрүкчүлүү ортумаа-биле 2,5 хуу боорунуң барымдаазы бар деп сайыт айыткан.
“Ажылдың бүдүрүкчүлүү чижилге чокка өспес. Ону бистиинге тургузуп турган даштыкы барыын компаниялар чоруй барган. Ынчангаш чурттуң иштинге бай хууда хөреңгитеннер, оларның капиталының рыногу херек. Бо талазы-биле нарын айтырыглар бар. Иштики рынокка чижилгелиг чорукту тургузарда, административтиг хемчеглерни, квазирыноктуң аргаларын ажыглаар ужурга таваржып турар бис” – деп, экономиктиг хөгжүлде сайыды чугаалаан.
/ РФ-тиң массалыг информация чепсектериниң ажык медээлеринден белеткээн.
Чурукту интернеттен хоолгалаан.
“Шын” №44 2025 чылдың ноябрь 13