Кызылга тускай шериг операциязының киржикчилери биле холдар, буттар протезтери кылып турар Россияның албан черлериниң төлээлери ужурашкан. Неделя дургузунда аңгы-аңгы кожууннарга регионнуң Күш-ажыл яамызы чурттуң протез-ортопед төптериниң төлээлериниң киржилгези-биле инвалидтер болгаш тускай шериг операциязының киржикчилери инвалидтер база инвалид уруглар болгаш оларны ажаап-карактап турар улус-биле ужуражылгаларны организастап эрттирер. Ооң темазы – реабилитация эртер техниктиг херекселдер болгаш протезтер алырынга дуза кадары.
Бо удаада протезтер кылыр албан черлериниң төлээлери дайынчы даалгалар үезинде кемдээшкиннер алгаш, холун, будун чидирген ТШО киржикчилери-биле ужурашкан. Чыылганнарга инвалид деп категорияже канчаар кирерин, протез кылдырарда, канчаар чагыг киирерин, чада бүрүзүнде кандыг-кандыг консультациялар ап болурун, кандыг хевирлиг протезтер барын болгаш оон-даа хөй айтырыгларны чугаалашкан.
«Бис, оон аңгыда, бертик-межел улуска Ажык эжиктер хүннерин база эрттирип турар бис. Оларга кайыын чүнү ап болурун тайылбырлап берип турар бис. «Азия» деп төптүң баазазынга олар эргежок чугула чүүлдерниң шуптузун ап болур: реабилитация эртер техниктиг херекселдер, холдар, буттарның протезтерин каяа, канчаар кылып турарын, канчаар чагыдып ап болурун – шуптузун аңаа билип ап турарлар» — деп, “КИБ-ОРТО” КХН-ниң төлээзи Анастасия Шумановская дыңнаткан.
Россияда протезтер рыногу бар, ажылдап турар деп медээни кижилерге чедирери эргежок чугула дээрзин Сибирь федералдыг округта “Моторика” КХН-ниң төлээзи Оксана Симкова чугаалаан: “Ол чугула айтырыгларның бирээзи-дир, ылаңгыя Тыва Республикага хамаарыштыр алыр болза. Бистиң кол сорулгавыс – чурттап турар чериниң аайы-биле протез кылдырып алыры, ылаңгыя Россияның протезтери, шиитпирлеттине бээр айтырыг-дыр деп чурттакчы чонга чедирери».
Неделя дургузунда протезтер кылып турар албан черлери республиканың кожууннарын кезиир, Чадаана, Ак-Довурак хоорайларга, Бай-Хаак, Самагалдай болгаш Сарыг-Сеп суурларга баар. Бүгү-ле сонуургаан айтырыгларын республиканың чурттакчы чону Тываның Күш-ажыл яамызындан билип ап болур.
Бистиң корр.
«Шын» №9 2025 чылдың март 13
