17 ажыг миллиард рубльди аңгылаан
Чазак Даргазының оралакчызы Дмитрий Патрушев чазактың эпидемияга удур доктаамал комиссиязының хуралын эрттирген. Аңаа Көдээ ажыл-агый, Бойдус курлавырларының яамылары, Ветеринарлыг болгаш фитосанитарлыг хайгааралдың федералдыг албан чериниң, Хереглекчилерниң эргелерин камгалаар болгаш кижиниң чаагай чоруунуң талазы-биле хайгааралдың федералдыг албанының база өске-даа чогуур албан черлериниң удуртукчулары, регион төлээлери киришкен.
Россияның Чазаа 2025 чылда вакциналар болгаш диагностика садып алырынга регионнарга 4,2 млрд рубльди аңгылаан. Бо адырга аңгылаан акшаландырыышкын үргүлчү өзүп турар, ниитизи-биле 17 млрд ажыг рубльди сөөлгү беш чылда эпидемияга удур ажылче чарыгдаан дээрзин Дмитрий Патрушев демдеглээн.
Халдавырлыг аарыг-аржык нептерээр айыылды эвээжедири-биле, ниити байдалды доктаамал хайгааралга алыры чугула деп ол санап турар.
«Аъш-чем хандырылгазынга технологтуг деткимче» национал төлевилелдиң иштинде аңгы федералдыг төлевилел ветеринарлыг байдалды экижидеринче угланган дээрзин Чазак Даргазының оралакчызы онзалап демдеглээн.
Бедик технологиялар чемпионады
Чемпионатка Россиядан болгаш найыралдыг чурттардан 15 муң ажыг кижи киржир. Россияның Чазааның Даргазы Михаил Мишустин Хай-Тех Чемпионадының финалистеринге чылыг-чымчак сөстерни чугаалаан.
Киржикчилерниң ниити саны 2025 чылда 2300 ашкан, 194 үлетпүр эксперттери мөөрейниң даалгаларын ажылдап кылырынга болгаш регион чадазында ажылды үнелээринге киришкен.
Бедик технологиялар талазы-биле «Профессионалдар» деп Бүгү-россияның профессионал мергежилдер чемпионадының шимчээшкининиң бир кезээ. Организакчызы – Россияның Өөредилге яамызы, а федералдыг оператору – Профессионал өөредилгениң хөгжүлдезиниң институду. Мөөрей «Аныяктар болгаш уруглар» национал төлевилелдиң «Профессионализм» деп федералдыг төлевилелиниң деткимчези-биле эртип турар.
16-гы Сочи джаз фестивалы
Бо хөглүг болуушкун Россияның Культура яамызының деткимчези-биле курорттар хоорайы Сочиге болуп эрткен. Фестивальга 16 муң ажыг кижи киришкен. Игорь Бутман, Москваның джаз оркестри база Владимир Пресняков олар гала-концертке бараалгааннар.
Хөгжүм фестивалы хоорайның үш шөлүнге болуп эрткен. Оон аңгыда аалчыларның аразында Виктор Добронравов, Алексей Гоман болгаш Бичии оркестр, Марианна Савон болгаш өске-даа онзагай артистер келген. Сочиге болган джаз фестивалынга тускай өөредилге черлериниң сургуулдары киришкен улуг хемчээлдиг өөредилге программазы база болган.
Буксирлиг хеме
Күрүнениң федералдыг унитарлыг бүдүрүлге чери «Росморпортта» NE060 төлевилелдиң хемези Чөөн чүктүң далай оруу-биле ажылдаар кылдыр туттунуп турар. Доозулган соонда, буксирни Крымдан Арктикаже иштики суг оруктары-биле чедирер. Ол Сабетта портунга ажылдаар. Танкерлерни болгаш чүък сөөртүр корабльдерни эдертип, оларны башкарып, ажык сугга болгаш дош аразынга хемелерни, чайганып турар корабльдерни сөөртүр. Бо күштүг Arc6-класс судно Ыраккы Чөөн чүкте кончуг берге доштуг черлерге чедимчелиг ажылдап шыдаар ужурлуг.
Благовещенск аэропортунда...
Аэропорттуң аэродром инфраструктуразының улуг хемчээлдиг чаартылгазының база бир чадазы доозулган. Ол ажылды «Транспорттуң үре-түңнелдиг системазы» национал төлевилел-биле чорудуп турар.
Ооң мурнунда аэропорт 3000 метр шөлдү чаартып, 24000 дөрбелчин метр шөлдүг чаа орукту ажыглалче киирген.
Амгы үениң инфраструктуразы аэропорттуң, ужудуушкуннуң айыыл чок чоруун болгаш пассажирлерниң таарымчалыг байдалын элээн экижидер. Чижээ, Благовещенск хоорайга Боинг 777 дээн ышкаш кызыгаарлаашкыннары чокка хүлээп ап болур. Ынчап кээрге хөй чүъктү-даа, пассажирлерни-даа сөөртүп болур аргалыг апарган.
Делгелгезин бараалгаткан
Санкт-Петербург хоорайда чурттуң улуг музейи Орус музейде орус уран чүүл төөгүзүнде эң-не билдингир пейзаж чурукчуларының бирээзи Архип Куинджиниң амыдыралының болгаш ажыл-ижиниң бүгү үелерин көргүскен 150 хире ажылдарны делгээн.
Аалчылар «Ладожское озеро», «Радуга», «Вечер в Украине», «Лунный свет в лесу. Зима», «Дубы», «Ночь» деп алдарлыг чуруктарны көөр.
Ылаңгыя Архип Куинджиниң «Днепрде айлыг дүне» деп ажылы онзагай. Бо дээрге караңгы черде көргүскен чаңгыс чурук-тур. Архип Куинджиниң ажылынга болгаш XIX чүс чылдың эртем ажыдыышкыннарынга тураскааткан «Чырык – шенелде кылдыр» деп интерактивтиг мультимедиа төлевилелин амгы үениң технологияларын, ооң иштинде нейрон четкизиниң үлегерлеп тургузарын ажыглап тургаш, делгелгеге тускай кылдыр көргүскен.
Анатолий Кони аттыг кудумчу
Анатолий Федорович Кониниң сактыышкын хүнүнде ооң ады-биле адаан кудумчуга албан ёзузунуң ажыдыышкыны болуп эрткен.
Анатолий Федорович онзагай юрист, шииткекчи, чогаалчы, хөй-ниитижи база күрүне ажылдакчызы, ооң амыдырал-чуртталгазы болгаш профессионал ажылы Санкт-Петербург-биле сырый харылзаалыг турган.
Санкт-Петербургтуң хоорай судунуң бажыңы Анатолий Кони кудумчузунда турар. Кудумчунуң эң-не эгезинде, Россияның Национал библиотеказының бажыңының чанында, Россияның Юстиция яамызының эгелээшкини-биле юриске тураскаалды тургускан. Хоорайның эрге-хоойлу ниитилелиниң төлээлери, культура ажылдакчылары база Бүгү-россияның күрүнениң юстиция университединиң Санкт-Петербургта салбырының студентилери А.Ф. Кониниң тураскаалынга боодал чечектерни салып, Москва проспектизи биле Анатолий Кони кудумчузунда яблоня ыяштарын олуртканнар.
Баштайгы спортчу хемчег
Тускай шериг операциязынга киржип тургаш, кемдээн дайынчыларның бир дугаар спортчу чыыжы Москва облазынга болуп эрткен. Хемчегге стол теннизи, дзюдо, армрестлинг, биатлон, шыдыраа маргылдааларынга Россияның аңгы-аңгы булуңнарындан келген дайынчылар идепкейлии-биле киришкен.
Ооң мурнунда чүгле адаптивтиг бокс болган болза, бо удаада спорттуң аңгы-аңгы хевирлеринге оюннар болган. Спортчу оюннарның бир онзагай хевири ча адарының тренировкаларын караа көрбес азы көөрү багай хамаатыларга мастер-класстардан ук хемчег эгелээн дээрзин сагындыраал.
Маргылдаада киржип келген чамдык караа көрбес дайынчылар бир-ле дугаар ча, согунну холунга тудуп, адып өөренип турар. Дайынчы хөделиишкиннер үезинде караан чидирген хамаатыларга хемчег солун болуушкун болган. Оон ыңай чыыш үезинде адаптивтиг бокска мастер-классты делегей чемпиону Роман Андреев эрттирген. РФ-тиң Параолимпийжи оюннар комитединиң Президентизи Павел Рожков келгеш, оолдарны деткип, оларга чылыг-чымчак сөстерни чугаалаан.
Дельфинни чандырыпкан
Август айның төнчүзүнде Бейсуг хемге чидип бар чыдар дириг амытаннарның санынче кирген шил думчуктуг дельфинниң тыптып келгенин тус черниң чурттакчылары эскерип каан. Дельфинни тускай специалистер хайгаарап эгелээн. Бейсуг хемче Азов далайдан балыктар соондан эштип келгени илдең. Суг сыыгай бээрге, дедир далайже кирип шыдавайн барганы ол.
Мал эмчилери дириг амытанны шинчип көргеш, хөй санныг балыктаар удазыннарны дельфинниң кежинден ужулгаш, далайже дедир салыпкан.
А. ОНДАР белеткээн.
Медээлерни болгаш чуруктарны интернет четкизинден алган.
“Шын” №37 2025 чылдың сентябрь 25