Тываның Баштыңы Владислав Ховалыг ХБАБ албанының хоочуннарынга болгаш ажылдакчыларынга мугур харлаан улуг байырлал таварыштыр байыр чедирген:
- «Чаагай чаңчылдарны кадагалап арттырары болгаш быжыглаары: күш-ажыл, өг-бүле, чаңгыс эп-сеткил» деп республикада байдалдың база 2023 чылда иштики политика дугайында Тыва Республиканың Дээди Хуралынга (парламентиге) Айыткалында аңгы эге кылдыр бижиттинген. Бистиң республиканың тускайлаңынга даянып тургаш, үстүнде айыткан сорулгаларны чедип алыры-биле үр хуусаалыг күрүне программазын ажылдап кылырының эргежок чугулазын демдеглеп тур мен. Бо айтырыгны шиитпирлээринге ХБАБ ажылдакчыларының ажыл-ижи канчаар-даа аажок улуг ужур-дузалыг.
Бөгүн бистиң чуртувуста ХБАБ-тың тургустунганындан бээр 105 чылдаан мугур байырлалын демдеглеп турар. Өг-бүлениң үнезин суртаалдап база ооң ат-алдарын бедитпишаан, бистиң ХБАБ албаны чонга “Госуслуга” ачы-дузазын дарый чедирип, сан-чурагай платформаларын идепкейлии-биле боттандырып турар. Тывага ноябрь айда төрүттүнген дугайында херечилелдиң бир дугаар чурагайлыг (электроннуг) шынзылгазын база тывыскан.
ХБАБ албанының ажылдакчыларынга болгаш хоочуннарынга кайгамчыктыг мугур байырлал таварыштыр изиг байырым чедирип тур мен. Бодуңарның мергежилиңерге ак сеткилдиг болгаш бедик харыысалгалыг ажылдап чорууруңар дээш өөрүп четтиргеним илередип тур мен. Ал-бодуңарга болгаш чоок кижилериңерге быжыг кадыкшылды база аас-кежикти күзедим!
