Владимир Путин Тываныӊ беш чурттакчызынга күрүне шаӊналдарын тывыскан.
Россияныӊ Президентизи Владимир Путин чурттуӊ шылгараӊгай хамаатыларын күрүне шаӊналдары-биле шаӊнаарыныӊ болгаш оларга хүндүлел атты, тускай эрге-дужаалды тыпсырыныӊ дугайында чарлыкка ат салган. Оларныӊ аразында Тыва Республиканыӊ чурттакчылары база бар.
Президентиниӊ чарлыы-биле «Россия Федерациязыныӊ алдарлыг ажылдакчызы» хүндүлүг атты үш эмчиге — Республиканыӊ уруглар эмнелгезиниӊ эргелекчизи Олег Володкинге, «Серебрянка» санаторий-профилакторийниӊ эмчизи Билчеймаа Достайга, Республиканыӊ онкология диспансериниӊ эмчизи Лариса Парчинге тывыскан.
Хоойлу чогаадырыныӊ талазы-биле идепкейлиг ажыл-чорудулгазы база хөй чылдарда ак сеткилдиг ажылы дээш «Хүндүлел ордени»-биле Тываныӊ Дээди Хуралыныӊ (парламентизиниӊ) Даргазы Каӊ-оол Давааны шаӊнаан.
Владимир Путинниӊ чарлыы ёзугаар республиканыӊ иштики херектер сайыды Сергей Кондрашовка полицияныӊ генерал-майору деп тускай эрге-дужаалды тывыскан.
Тываныӊ Баштыӊы Владислав Ховалыг Президентиниӊ ук шиитпириниӊ дугайында дыӊнатпышаан, шаӊнаттырган улуска байыр чедирген. «Чурттуӊ лидериниӊ өмүнээзинден күш-ажылын үнеледип, бүгү-российжи хүндүткелди чаалап алган, шаӊнаттырган чаӊгыс чер чурттугларымга байыр чедирип тур мен» — деп, республиканыӊ удуртукчузу социал четкиде блогунга бижээн.
Президентиниӊ ноябрь 8-те ат салган чарлыктарын эрге-хоойлу медээлериниӊ албан ёзузунуӊ порталында, чырыдып салган. Чарлыктарны хөйге чарлаан үезинден тура күштүг болур.
Бистиң корр
“Шын” № 86 2023 чылдың ноябрь 11
