Владислав Ховалыг Россияның Дзюдо федерациязының президентизиниң оралакчызы Валентин Хабиров-биле ажылчын ужуражылганы эрттирген. Талалар бо чылдың июньда болур дзюдо хүрешке Россияның кубогунга белеткел дугайында чугаалашкан. Тываның Баштыңының чугаазы-биле, бо мөөрей чүгле республикага улуг ат-алдар эвес, а шыңгыы харыысалга болур.
«Бистиң сорулгавыс — маргылдааны эң-не бедик деңнелге эрттирери, келген спортчулар-даа, мөгейикчилер-даа тыва черниң хүндүлээчелин, бистиң хүреш талазы-биле чаңчылдарывысты билип алыры болур» — деп, Владислав Ховалыг дыңнаткан.
Ужуражылгага Тыва Республиканың спорт сайыдының хүлээлгезин күүседип турар Владимир Тулуш, Россияның Дзюдо федерациязының президентизиниң оралакчызы болгаш күүсекчи директору, дзюдо хүрешке Россияның алдарлыг тренери Валентин Хабиров, Россияның Дзюдо федерациязының килдис удуртукчузу болгаш спорт директорунуң оралакчызы Денис Матюхин база регионнуң Дзюдо федерациязының президентизи Чаян Доржу олар киришкен.
Маргылдаага белеткел ажылын республиканың организастыг комитеди, федералдыг болгаш регионалдыг дзюдо федерациялары, ол ышкаш Тываның Спорт яамызы удуртуп турар.
Дзюдо хүреш республикада спорттуң кол хевирлериниң бирээзи болур. Дзюдо хүрешке Тыва Республиканың чыынды командазында 400 ажыг спортчу белеткенип турар, оларны спортчу школалардан 19 тренер баштап турар.
Ужуражылганың түңнелинде " Бисте тыва дзюдо хүрешке ынак салым-чаяанныг спортчуларывыс хөй. Мындыг бедик деңнелдиг маргылдааны эрттирери республикага бо угланыышкынныг мергежилдиң сайзыралынга чаа-чаа идигни берип, спортче оон-даа хөй аныяктарны хаара тудар дээрзинге бүзүрээр мен" — деп, Владислав Ховалыг бодунуң МАХ каналынга демдеглээн.
2025 чылда Вологда облазының Череповец хоорайга Россияның кубогу болуп эрткен. Аңаа чурттуң 50 регионнундан 300 ажыг спортчулар киришкен болгаш тыва мөге Каң-Демир Сүге-Маадыр 60 килге үшкү черни чаалап алган.
Бистиң корр.
Чурукту ТР-ниң Чазааның парлалга албанындан алган.