Эрткен хүннерде Россияның Президентизи Владимир Путинниң холундан тускай шериг операциязынга дайынчы даалганы маадырлыы-биле күүсеткени дээш “Алдын Сылдыс” медальды алган гвардияның улуг лейтенантызы, Россияның Маадыры Чалым Чүлдүм-оолду июнь 1-де Тывага уткуп алган.
Байырлыг уткуушкун Абакан талазындан Кызылче кирер орукта “Даш хоорайжыгашка” болган. Хүндүлүг аалчы уткуур тыва чаңчыл ёзугаар национал хөгжүм херексели игилге аялгалар-биле үдетпишаан, Маадырның дөргүл-төрели, эш-өөрү, шериглер болгаш журналистер уткуп алган. Маадырның авазы Зоя Кыргысовна Чүлдүм-оол оглун ак кадак болгаш сүттүг шай-биле уткуп алган.
«Чалым чеди ажы-төлүмнүң хеймери. Ол туруштуг болгаш кончуг кызымак кылдыр өзүп келген. Кезээде бир-ле чаа чүүлге өөренген чоруур кижи. Аныяк салгалга үлегерин көргүзүп чоруур төлептиг кижи болганы дээш оглумга чоргаарланып тур мен”- деп, эрес-дидим оолдуң авазы Зоя Кыргысовна чугаалаан.
Россия Федерациязының Президентизиниң Чарлыы-биле дайынчы даалганы маадырлыы-биле күүсеткен эрес-дидим чоруу дээш гвардияның улуг лейтенантызы Чалым Сюндюпович Чүлдүм-оолга Россияның Маадыры атты тывыскан болгаш ылгавыр демдек – “Алдын Сылдыс” медальды хөрээнге кадаанын сагындыраал.
Алган бедик шаңналынга хамаарыштыр Чалым Чүлдүм-оол: “Бо шаңнал чүгле мээң эвес, а кады эрес-дидим тулчуп турган эштеримге база хамааржыр. Мени бөгүн деткип келген бүгү кижилерге четтиргеним илередир-дир мен” – деп, ол чугаалаан.
Ооң маадырлыг чоруу Ада-чурттуң Улуг дайынының үезинде дег, эрес-дидим чоруктуң үлегери болган. Эрткен чылдың декабрьда дайынчы хөделиишкин үезинде дайзынның автомашиналарын өскелерни мурнай Чалым Чүлдүм-оол эскерип каан. Кончуг дүрген шиитпирлээш, ол автомашиналарны узуткаары-биле аңгы бөлүктү чыггаш, боду дайзынның турар черинче углуг баштап чорупкан. Эрес-дидим болгаш шиитпирлиг хөделиишкиннерниң түңнелинде, дайзынны узуткааш, дайынчы даалгазын күүсеткен.
Чалым Сюндюпович Чүлдүм-оол Өвүрнүң Чаа-Суурга төрүттүнген. Ол академик М.Ф Решетнёв аттыг Сибирьниң күрүнениң аэрокосмос университедин дооскан. Российжи шериг албан-хүлээлгезин күүседир мурнунда, төрээн кожуунунга, Республиканың 1 дугаарлыг эмнелгезинге ажылдап турган. Ол “Эрес-дидим чорук дээш” деп медаль болгаш “Төрээн чурттуң мурнунга ачы-хавыяазы дээш” деп медальдың II чадазы-биле шаңнадып турган.
Россияның Маадыры Мерген Донгактың соонда Тывадан үш дугаары Чалым Чүлдүм-оол Маадыр атты алган болуп турар. Бир дугаар “Алдын Сылдыс” медальдың эдилекчизи Россияның Армиязының генералы Сергей Шойгу.
ТМГ-ниң медээзинден К.Монгуш белеткээн.
