Шаанда шагда Назарет деп хоорайга эр кижиже чоокшулап безин көрбээн Мария деп херээжен кижи чурттап чораан. Ол Ыдыктыг Сүлдеден саатталы бергеш, Бурганның төлүн бодарадыр аас-кежиктиг болган. Ук медээни чедирип келген бурганның элчизи: “Силерден бүгү-ле кижилерниң дузалакчызы болур Бурганның оглу төрүттүнер” – деп чугаалаан. Ол үеде Марияны Иосиф-биле шагда-ла дүгдеп каан турган. Иосиф Марияның саатталы бергенин билип кааш, Марияга өгленмес деп барган. Ооң дүжүнде Бурганның элчизи чедип келгеш, Марияның иштинде Бурган төлү бар дээрзин чугаалааш, аңаа өгленип алырын сүмелээн. Ол аңаа чөпшээрешкеш, Мария чиигеп алгыжеге чедир ооң мага-бодунга дегбейн, кадагалап, карактап келген.
Ынчан император Август Римге чагырыкчылап турган. Ол чурттакчы чонну чизелээр деп шиитпирлээн. Чизелээшкин үезинде кижи бүрүзү бодунуң төрүттүнген черинче чоруур ужурлуг. Ынчангаш Иосиф биле Мария база Назареттен боттарының төрүттүнген хоорайы Вифлеемче чорупкан.
Аңаа баргаш, дүн чарып алыр бажың тыппааннар. Кадарчыларның мал кажаазы кылдыр ажыглап турганы куйга хонар ужурга таварышканнар. Ол дүне Мария чиигээн. Ол оглун чөргээш, мал чемгерер савага саваң кырынга чыттырып каан.
Ол-ла дүне дээрге чаа сылдыс тыптып келген. Ырак эвес черге хой кадарып чораан малчыннарга Бурганның элчини келгеш, Камгалакчы – Иисус Христос төрүттүнген деп өөрүнчүг медээни дыңнаткан. Чаш төлдү кайыын тып алырын медээчи чугаалаарга, куйда чаа төрүттүнген Бурган төлүнче олар чорупкан. Иисусту көөр дээш дириг амытаннар база четкилеп келген.
Христос анаа төл болуп өзүп олурган. Кажан улгадып келгеш, Бурган дугайында база ооң кижилерге ынакшылын, өскелерге багай чүүл кылбас дээш, канчаар чурттаарын, өршээп база дуза хереглээн кижилерге дузалажып билир ужурлуг дээрзин чугаалаан.
Ынчангаш Рождество байырлалы дээрге өг-бүлениң чаңгыс черге чыглып келгеш бот-боттарынга чаагай күзээшкиннер чугаалаар, эптежир болгаш өршээр, хилинчектенип турар кижилерже сагыш салыр, буянныг ажыл-херек эгелээр үе. Рождество – Бурганның кижилерге ынакшылының демдээ.
