Хөй ажы-төлдүг болгаш орулгазы эвээш өг-бүлелерниң бажың-балгадынга автономнуг өрт медээлекчилерин халаска тургузуп бээр
Хөй ажы-төлдүг болгаш хандырылгазы кошкак өг-бүлелерге деткимчениң немелде хевирин Тываның эрге-чагыргалары киирип турар. Республика бюджединиң акша-хөреңгизи-биле өрт медээлекчизи автономнуг дериг-херекселди оларның бажың-балгадынга тургузуп бээриниң шүүделин төлеп бээринге олар белен. Ооң дугайында хамаарышкан хоойлу төлевилелин республиканың Чазаа деткип, ону бадыладыры-биле ТР-ниң Дээди Хуралынче киирген.
Өрт медээлекчизи – бажың-балгатта ышталыышкынны, өрттениишкинни медээлей бээр инфра-кызыл хемчээкчилиг дериг-херексел. Тыптып олурар айыылды баш бурунгаар медээлеп, алгырып, удаан улусту оттуруптар.
Кандыг өг-бүлелер бажың-балгадынга өрт медээлекчизин халас салдырып ап болурул? Олар дээрге үш болгаш оон хөй ажы-төлдүг, инвалид уругларлыг, а ол ышкаш орулгазы регионда доктаадып тургустунган чурттаарының эң адаккы хемчээлинден ашпайн турар орулгалыг хөй ажы-төлдүг өг-бүлелер-дир. Олар дөгерези суугу-биле одаар бажыңнарда чурттап турар болур ужурлуг.
Өрт медээлекчилериниң дузазы-биле айыыл-халаптан улустуң когараар чоруун болдурбайн барып болур деп хоойлу төлевилелиниң ажылдап кылыкчылары санап турар. 2022 чылда республикага болган өрттерге 19 кижи, ооң иштинде бир бичии уруг амы-тынындан чарылган. Угарлыг газтан хоранналыышкынны 49 улуг кижи, 13 бичии уруг алган. А 2023 чылдың эгезинден тура ындыг таварылгаларның саны 14 четкен, угарлыг газтан чеди кижи өлген.
Социал албаннарның сан-медээзинден алырга, бөгүн Тывада хөй ажы-төлдүг 32 280 өг-бүле чурттап турар, оларның 17 493-ү ажы-төлдүг, орулгазы эвээш, а ол ышкаш инвалид уруглуг 2 627 өг-бүле бар.
Онза байдалдар яамызының специалистериниң чорутканы шинчилелдер өрт медээлекчилериниң ажыглалы оттан камгаланырының эң дээштиг, үре-түңнелдиг хевири болуп турар. Оларның ачызында өрттерниң саны 25—30 хуу кызырылган, а когараан кижилерниң саны 46—60 хуу эвээжээн.
/ А. Хертек белеткээн.
Чурукту интернет четкизинден алган.
#Тывачазак #Тыва #Онзабайдалдаряамызы # Өртмедээлекчилери #Шынсолун #Медээлер