Амгы үеде Тывада барык өг-бүле бүрүзүнде эвээш дизе, чаңгыс автомашина бары чазыг болбас. Ниитизи-биле республикада янзы-бүрү хевирлерлиг 75602 автомашина бүрүткеттинген деп Тываның күрүне автоинспекциязының парлалга албаны дыңнадып турар.
Ынчалза-даа чолаачы бүрүзүнде гараж чок болганындан, улуг эдин кудумчуга тургузар ужурга таваржып турар. Ынчангаш кышкы үеде автомашиналар бо-ла доңуп каар. Ону болдурбазы-биле, чолаачылар техниканың кол хөделдирер механизмнериниң кырынга чоорганны шып ап турарлар. Пөс материалдар эрттир изээш, өрттенип турар таварылгаларның саны соок үеде каш дакпыр көвүдеп кээр деп, Тываның Онза байдалдар яамызының парлалга албаны демдеглеп турар.
Бо чылын автомашиналарга хамаарышкан 78 өрттү ведомствонуң ажылдакчылары өжүрген. Бо чылга деңнээрге, эрткен чылын 14 таварылга эвээш болуп турар. Ооң кол чылдагааны – техниканың электри удазыннарында үрелиишкиннер.
Ёзулуг дыңзыг сооктар чаа кел чыдар, ынчангаш бир дугаар ээлчегде автомашиналарның байдалын хынап алыры чугула. Ол ышкаш албан өрт өжүрер херексел салон иштинге турар ужурлуг деп камгалакчылар сагындырып турар.
Ол ышкаш соок үеде гаражтар иштинге өртке удур дүрүмнерни сагывазының уржуундан өрт айыылы улуг бооп турар. Хөй кезии –оран-сава ишти чылыдар кылымал херекселдер өрттүң өөскүп үнер дөзү ол. Ынчангаш гаражка өрт медээчизин салыры чугула.
Олча СААЯ.
“Шын” № 98 2024 чылдың декабрь 21