Кызылдыӊ ийи чурттакчызы хоойлуга чөрүштүр спирттиг продукция садып-саарып турганы дээш буруудаттырып турар.
Республиканыӊ прокуратуразы оларга хамаарыштыр кеземче херээниӊ буруудадыр түӊнелин бадылаан. Бөлүк кижилер чогуур чөпшээрел чокка спирт холуксаалыг продукцияны мөөӊү-биле садып алгаш, ону сөөртүп, шыгжап турган, тодаргайлаарга, РФ-тиӊ Кеземче дүрүмүнүӊ 171.3 чүүлүнүӊ 1-ги кезээнде көрдүнген кем-херекти үүлгеткен.
2022 чылдыӊ декабрь 11-де олар Хакас Республиканыӊ Абакан хоорайдан спирттиг продукцияны мөөӊү-биле садып алгаш, автомобильдиӊ салонунга шыгжап суп алгаш, Тыва Республиканыӊ девискээринче сөөртүп эккелген дээрзи истелге үезинде билдинген.
Эрге-хоойлу камгалаар органнарныӊ ажылдакчылары оларныӊ 300 муӊ ажыг рубль-биле садып алганы 600 литр спирт холуксаалыг продукцияны хавырган.
Кеземче херээн алыс ужуру-биле сайгарар кылдыр Бии-Хемниӊ район судунче чоруткан.
Үстүнде айыттынган кем-херекти үүлгеткени дээш ийи-үш хире миллион рубльга торгаар, бир болза, үш чыл иштинде ниитилелге ажык-дузалыг ажылдар кылыр, азы үш чыл дургузунда эрге-дужаал ээлээр эргезин хавыргаш, хосталгазын казыыр ялага онаажып болур.
Республика прокурорунуӊ удуг дузалакчызы С.А. ООРЖАК.
Р. ДЕМЧИК очулдурган.
"Шын" №43 2023 чылдың июнь 14