Республикада хөмүр-даш өртээн өйлээр талазы-биле ажылдар сөөлгү чылдарда удаа-дараа болуп турар дээрзин билир бис. Республиканың чурттакчылары хөмүр-дашты чиигеткен өртек-биле садып ап турар. Экономиктиг барымдаалар езугаар, өртектер өйлээшкини чылдың-на болуп турар.
2024 чылдың январь 1-ден эгелеп хөмүр-даштың болгаш кудумчу автобустарының өртээн өйлээн. Хөмүр-даш өртээ 5,6 хуу, а кудумчу автобустарының өртээ 14 хуу өзер.
Эрткен неделяда ТР-ниң Баштыңы Владислав Ховалыг хөмүр-дашты 1 тоннада 2765 рубльга садар дугайында доктаалга атты салган. 2023 чылдың өртектеринге деңнээрге, хөмү-даштың өртээ 5,6 хуу азы 145,7 рубль хөй болур.
Тываның Өртектер өйлээр албан чериниң удуртукчузу Елена Бочарованың чугаалааны-биле алырга, өртектер индексациязы чылдың-на болуп турар. Ук өйлээшкин чурттуң иштики-даа, даштыкы-даа экономиказынга ужур-дузалыг. Хөмүр-даш казарда чазылдырар материалдарның өртээниң өскени болгаш ону шыгжаарының база чедирериниң чарыгдалдарының улгатканы ооң садар өртээниң өскенинге салдарлыг болган.
ТР-ниң одалга болгаш энергетика сайыды Эдуард Кууларның чугаазы-биле алырга, хөмүр-даш казып, тывар ажылдың чарыгдалдары улуг. Хөмүр-даш казып тура, ажыглаар материалдарны база албан садар боор. Дериг-херекселдер тура дүшпейн, үзүк-соксаал чокка ажылдазын дээш, оларны удаа-дараа чаартыры база албан.
2024 чылдың январь 1-де чүгле хөмүр-даштың эвес, а хоорай иштинде кудумчу автобустарының өртээнге база 14 хуу индексация болур. Ооң мурнунда 28 рубль турган болза, чаа чылдан эгелеп 32 рубль апаар.
Кудумчу автобустарының өртээн өөренип көрүп турган үеде, пассажирлер сөөртүр хууда сайгарлыкчылар болгаш «Автоколонна 17» бүдүрүлге чери 36 рубльга доктаадыр дугайында саналды киирген турган. Ынчалза-даа ТР-ниң Чазаа Кызыл хоорай иштинге аргыжылга өртээн 32 рубльга доктааткан дээрзин сагындыраал.
«Хоорай иштинде пассажирлер аргыштырар автобустарның расписаниезиниң аразының хемчээлин канчаар сагып турарын, кайы хире пассажирлер аай-дедир аргыжып турарын хынаар дээш хүннүң-не үнүүшкүннерни организастап, мониторингини кылып чорудуп турар бис. Чижээлээрге, бөгүн Кызыл хоорайның девискээринде 162 транспорт пассажирлер сөөртүп ажылдап турар. Оларның 99-у хоорай иштинде, а артканы хоорай чоогунда Сукпак, ыраккы Каа-Хем дээн ышкаш сумулар биле Кызылдың аразында халдып турар» – деп, ТР-ниң Орук-транспорт сайыдының оралакчызы Денис Хангай чугаалаан.
ТР-ниң Баштыңы Владислав Ховалыгның демдеглээни-биле алырга, 2024 чылдың бир дугаар кварталында республикага 20 чаа автобус кээр. Оларны хоорайның Вавилин ээтпээ дээн ышкаш чедери берге микрорайоннарже баар маршруттарга салыры планда көрдүнген.
Айдың ОНДАР.
Буян ООРЖАКТЫҢ тырттырган чуруктары
«Шын» №100 2023 чылдың декабрь 30
