Тываның Экономиктиг хөгжүлде болгаш үлетпүр яамызы социал ужур-уткалыг аъш-чем продукциязының өртектерин турум тудар дээш, элээн каш улуг садыг четкилерин, ооң иштинде «Пятёрочка» база «Батон» садыгларны башкарып турар X5 Group аъш-чем компаниязының башкарыкчы организациязы – «ИКС 5 корпоративтиг төп» ПАН-биле өртек дугуржулгазын чарган.
Тываның Баштыңы Владислав Ховалыгның Дээди Хуралдың депутаттарынга Айыткалында даалгазы езугаар, ол дугуржулганы чедип алган. Регионнуң удуртукчузу кижилерге бо чугула айтырыгны Чазак доктаамал хыналдада тудуп турарын база бодунуң бүрүн эргелери-биле өртектерни чурумчудар талазы-биле ажылды уламчылаарын демдеглээнин сагындыраал. Ылаңгыя регионда аъш-чем өртээн турум тудар талазы-биле хемчеглер планын ажылдап кылырын база садыг четкилери-биле чогуур дугуржулгаларны чарарын Экономика болгаш Көдээ ажыл-агый яамыларынга дааскан турган. Владислав Ховалыг өртектерниң үндезин чок өзүлдезин болдурбас дээш, кол барааннар болгаш ачы-дузаларга негелдениң деңнелин шыңгыы хайгааралга алыры чугула дээрзин онзалап демдеглээн.
Экономиктиг сайзырал яамызы чедип алган дугуржулга өртектерни контрольдаар арганы берип, чурттакчы чонга эргежок чугула барааннарның чедингирин магадылаар деп тодаргайлаан. Ол, бодунуң ээлчээнде, регионда турум экономиктиг байдалды тударынга идиглиг.
Дугуржулгада, ылаңгыя, чамдык социал ужур-дузалыг барааннарны садарының үстүкү деңнелин тургузарының, садыгларда оларның доктаамал турарының база өртектерни эвээжедир хемчеглерге киржириниң, чижээ, тускай программаларны болгаш социал берге байдалдыг бөлүктерниң чиигелделерни көргүзериниң хүлээлгелерин көрген. Дугуржулга «Батон» болгаш «Пятёрочка» садыгларынга хамааржыр. Бо чүүл регионнуң чурттакчыларынга эң-не нептереңгей билдингир садыг четкилеринде барааннарның турум өртектерин болгаш барын хандырар.
Оон аңгыда, садыг четкизи-биле кады ажылдажылганы хөгжүдеринче угланган Тыва Республиканың Чазааның доктаалының төлевилелин ажылдап кылганын Экономиктиг сайзырал яамызы дыңнаткан. Документиде тус черниң бүдүрүлгезин хөгжүдерин, тыва бүдүрүкчүлерниң садар продукциязының хемчээлин көвүдедирин база чаа ажылчын олуттарны тургузарынга кады ажылдаарын көрген. Бо чүүл чүгле өртектерни турум тудар эвес, а тус черниң бизнезинге деткимчени улгаттырып , оларның өзүлдезинге болгаш хөгжүлдезинге дузалаар.
Хүлээп алган шиитпирлер регионда социал-экономиктиг байдалды экижидер болгаш Тываның чурттакчыларынга барааннарның чедингирин хандырар талазы-биле комплекстиг хамаарылганың бир кезээ деп, яамы демдеглээн.
А.МОНГУШ.
Чурукту интернет четкизинден алган.
“Шын” №6 2025 чылдың февраль 20
