“Сүбедей” спортчу школага часкы дыштанылга хүннери оолдар, уругларга дыка солун болган.
Агаар-бойдус чылып, хар эрип, чер карарып келгенде, эң ылаңгыя “Сүбедей” спортчу школаның доштуг чуңгузунга конькилиг чуңгулаарга – магалыг-ла! Школаларның өөреникчилери социал башкыларның удуртулгазы-биле хүннүң-не 2 шак дургузунда чуңгулап болур.
Кызыл хоорайның № 17 школаның 5, 7 болгаш 9-ку класстарның 34 өөреникчилери боттарының социал башкызынга үдеттирип алгаш, “Сүбедейниң” доштуг чуңгузунга конькилиг чуңгулааннар. Тыва Республиканың спортунуң тергиини, дошка конькилиг чуңгулаарының инструктору Наталья Хомушку мастер-классты эрттирип, коньки кырынга тендирбейн турарынга болгаш чуңгуларын көргүзүп, айтып берген. Дошка 2 шак дургузунда чуңгулааш, оолдар, уруглар чиик-сергек, омак-хөглүг апарганнар.
Ынчангаш олар режиссер Джон Ли Хэнкоктуң “Көзүлбес талазы” деп кинону дыка сонуургап көргеннер. Өскүс-чавыс ядыы оол Майк Оэра аштап-түреп чорааш, бодунуң кызымаа-биле Американың футболга национал лигазының сылдызынга четкен берге оруунуң дугайында кинону оолдар, уруглар дыка сонуургааннар. Майк Оэраның чурттап эрткен белен эвес оруунда оларга үлегер-чижек бооп болур чүүлдер бар.
“Сүбедей” спортчу школага эрттиргени 3 шак № 17 школаның өөреникчилеринге дыка солун болган.
Часкы дыштанылганың төнчүзүнге чедир Кызыл хоорайның Т.Б. Кечил-оол аттыг № 3 школазының, № 5 болгаш 9 гимназияларнының өөреникчилери “Сүбедей” спортчу школага кээп, ажыктыг болгаш солун кылдыр дыштанып алыр аргалыг боорлар.
/ Алтынай ЧИМИТ.
Авторнуң тырттырган чуруктары.
