Тываның Көдээ ажыл-агый болгаш аъш-чем яамызы «Наадым–2024» малчыннар байырлалының чемпионнарын болгаш мурнакчыларын шилип тодараткан. Комиссияның хуралынга 56 кордакчының ажыл-ижин сайгарып көрген. Республиканың аңгы-аңгы кожууннарындан 51 малчын шаңналдыг черлерже кирген.
«Наадым–2024» малчыннар байырлалының чемпионнарының бирээзи – Сүт-Хөл кожууннуң Бора-Тайга сумузундан хойжу Виталий Монгуш.
Ыдыктыг Кызыл-Тайганың эдээнде, Үстүү-Дөргүн деп черде Виталий биле Билзеймаа Монгуштар малчыннап турар. Сүт-Хөлдүң көктүг-шыктыг Дөш-Бажы деп черде чайлаанга мал-маганын одарладыр. Монгуштар бир оолдуг.
Виталий Монгуш салгал дамчаан малчын. Ада-иези Кара-оол Медээчи-оолович биле Алевтина Бопун-ооловна бүгү назынында мал азырап чораан алдарлыг хойжулар.
Аныяк малчын хөй ажы-төлдүг өг-бүлениң хеймер оглу. Ол школа дооскаш-ла, эш кадарчылап киргеш, бо хүннерге чедир чымыштыг ажыл-иште. Чээрби ажыг чыл дургузунда малын малдап турары бо. Виталий Монгуштуң ачазы Тываның алдарлыг малчыны.
Сүт-Хөл кожууннуң көдээ ажыл-агый эргелелиниң дыңнадып турары-биле алырга, аныяк көдээ ишчилер 100 хойга онааштыр 110 хураганны камгалап ап турар эрес-кежээ малчыннар.
Монгуштарның өдээнде шээр малы муң чедип турар. Ол ышкаш бода малдыг, аскыр өөр чылгылыг.
Ш. ХОВАЛЫГ.
Чурукту маадырның хууда архивинден алган.
"Шын" №54 2024 чылдың июль 20
![](https://shyn.ru/media/cache/2024/07/21/n9ragihejdwo9bpfr0irhqzrsb2hv1k4ajwkdh-xp-ubyfymky-0ple7-bchnwu9d3fh0jqnnxceikjdort9hme1-06c8d6e4ec.jpg)