Тускай шериг операциязының болгаш Сирияга хөделиишкинниң киржикчизи Милан Баазаң Чеди-Хөл кожууннуң Сайлыг сумузунга социал керээ программазының ачызында эъттен кылган полуфабрикаттар бүдүрүлгезин ажыткан. Ол шупту продукцияны өөнүң ишти Айлана Баазаң-биле кылып турар, улаштыр кат-иези болгаш катты сугнуң суурда садыынга сайгарып ап турарлар. Кандыг-даа химикаттыг бүдүмелдер болгаш оон-даа өске холумактар чок аъш-чемни Сайлыгның чурттакчылары арттырбайн, садып ап турарлар. Кызымаккай өг-бүлениң продукциязы садыгга черле үр чытпас.
Милан Баазаң 1998 чылдың ноябрь 22-де Кызыл хоорайга төрүттүнген. Ол 2016 чылда Хорум-Даг школазын дооскаш, Кызылдың эрге-хоойлу болгаш экономика техникумунга юрист мергежилиниң дипломун холунга алгаш, шериг албан-хүлээлгезин күүседип чорупкан. 2020 чылда Улан-Удэге шериг кезээ-биле керээ чарып алган. Сирияга чартык чыл дургузунда дайынчы хөделиишкинге чогумчалыг киришкен. Шөлээ соонда тускай шериг операциязының бирги хонуундан тура янзы-бүрү шериг даалгаларын чедиишкинниг күүсеткен. Улаштыр Милан Баазаңның соондан 48 харлыг ачазы Сергей Деспеевич Сагалаков Россияның Камгалал яамызы-биле керээни чарган. Аныяк дайынчы оолдуң өөнүң ишти ийи дугаар төлү-биле иштиг болурга, тускай шериг комиссиязы Милан Баазаңның ачазы ТШО-нуң мурнуку одуругларында хөй-ле суурларны хостап турар дээш, Баазаң-биле керээни соксадып болур чөпшээрелди берген.
Чеди-Хөлдүң Сайлыг сумузунуң күдээзи өөнүң иштиниң төрээн черинге бодунуң хууда ажыл-херээн ажыдар деп шиитпирге келген. Суур черде мал-маган көвей, эът аймаандан бүдүрүлге кылыр болза орулгалыг болуру чигзиниг чок. Эң кол чүүл — продукция янзы-бүрү болур ужурлуг деп түңнелге келген. Халас үе эрттирбейн, социал керээ программазынга киржир сорулгалыг документилерни шудургу четчелеп эгелээн. Ачы-дуза төлевилелиниң комиссиязы Милан Баазаңның эгелээшкинин деткип, 350 муң рубльди чөпшээрээн. Деткимче акшазы-биле продукция кылыр оран-саваны септеп-селип алган. Ол ышкаш соодукчулар чугула херек болурга, акшазын чедиштирип, кырындан немеп тургаш, улуг өртектиг дериг-херекселди саткан.
Март айда бодунуң улуг эвес хууда херээн байырлыг байдалга ажыткаш, аъш-чем бүдүрүп кирипкеннер: манчылар, буузалар, тефтелилер, котлеталар, колбаса дээш эът аймаандан кылып турар продукциязы хөй янзы. Оон аңгыда, көрей кухняның соок чемнерин база кылып турар, ол ышкаш огурецтер, помидорлар, аджика, горлодёр, саржаг, аңгы-аңгы чаглар дээш элбек продукция-биле Сайлыг сумузунуң чурттакчыларын хандырып турар. Аныяктар амдыызында ол шупту аъш-чемни боттары кылып турар, ындыг-даа болза ажыл-херээ ам-даа сайзыраар деп чүүлге улуг бүзүрелдиг.
Бо хүнде Милан Баазаңны чаңгыс дүвүредип турар чүүл – ачазы Сергей Сагалаков 6 ай дургузунда харылзааже үнмээн. Ол Росгвардияның хоочуну, арга-дуржулгалыг дайынчы. ТШО-нуң мурнуку одуругларынга чоруп тургаш, ийи катап балыглаткан. Орнун солаан адазы харылзааже үнмеске дүвүрелге алзып турар.
Олча ОНДАР.
Чуруктарны Чеди-Хөл кожууннуң чагыргазының ВКонтактеде арнындан алган.
“Шын” №14 2025 чылдың апрель 17
