Эрткен 2023 чылдың декабрь айның эгезинде Таңды кожууннуң чурттакчызы Алдын-Херел Дүрген-оолович Шимет Балгазын суурга социал керээ дузазы-биле хеп чуур черни ажыдып алган. Күрүне деткимчези 350 муң рубль-биле 4 улуг 10 килдиң хеп чуур машиналарын болгаш суг сордурар станцияны садып алган.
Оран-сава айтырыы база бир нарын айтырыгларның бирээзи. Ынчалза-даа ол алызындан черле шевер кижи болгаш, бодунуң эрги гаражын септеп-селээш, эде кылып алган. Бо бүгүнү кылып белеткээринге кандыг-даа бергедээшкиннер турбаан, кыдыындан дузалажыр холдар хереглеттинмээн, шуптузун өгнүң эр ээзи боду кылган.
Бо ажыл өг-бүле бюджединге база кончуг ажык-дузалыг болган. Олар 3 ажы-төлдүг, кайызы-даа башкы эртемниг өг-бүле. Алдын-Херел Шимет Кызылдың башкы колледжин дооскаш, республиканың элээн каш школаларынга ажылдаан. Өөнүң ишти Балгазынның школазында башкы.
“Беш кижиге өг-бүлениң орулгазы чедишпес болганы-биле, бодумнуң ажыл-херээмни ажыткаш, улаштыр сайзыраар бодалга келген мен. Ооң мурнунда суурга хеп чуур чер турбаан. Чурттакчы чон идик-хевин чугдуруп алыр дээш, хөй-ле кижи хоорай кирер ужурга таваржып турган. Ынчангаш чонга хеп чуур чер херек-тир дээрзин билдивис” – деп, Алдын-Херел Шимет чугаалаан. Балгазынчылар найысылалче хеп чугдуруп кирбес апаргаш, боттарының үезин-даа, акша-хөреңгизин-даа камнап алыр аргалыг болганнар.
Келир үеде чоннуң дилээ-биле хевистер чуур улуг машинаны болгаш кургадыр херекселди садып алыр сорулганы база салган. Сайзыралче чүткүлдүг аныяктар улаштыр сайзырап чоруй баарынга идегел улуг.
Ч.СААЯ
«Шын» №1 2024 чылдың январь 10
