«Шын» солундан халас чер дугайында чүүлдү номчааш, шаанда Тока дарга мурнакчы ажыл-ишчилерге, специалистерге халас 8 соток черлер берип турганын сактып келдим.
1955 чылда Кызыл хоорайның оң талакы эриинге дачалар тургустунган, ооң хөй кезии даргалар дачалары турду. Оон сөөлүнде солагай эрикке дачалар тывылган чүве. Ынчан хараганныг, элезинниг чер турду. Ол үеде орус чон хөй турган. Шупту каттышкаш, 3 дугаар дача ниитилелин ынчан тургускан. Дача ниитилелиниң даргазы 8 сотокту хемчээп бергеш, херим кылыр ыяштарны халас берип турган. Огород ажылын билбес улусту канчаар, чүнү тарыырын орустар өөредип турар чүве. Бис школага өөренип турган үевисте огородка авам, ачам-биле кады ногаа өстүрүп ажылдап турдувус. Ынчан бажың-даа шоочалавас, кудук мотору даштыгаа турар, дыка-ла эки үелер турду. Ол дачамга дыка ынак турдум.
Ынчан машина-балгат эвээш, дачаже автобус халывайн турган. Оон чоорту дача чону көвүдээрге, 13 дугаар автобус маңнап эгелээн. Аңаа дыка өөрээн бис. Дача автобузу орай 23.00 шакка чедир халыыр турду. Огород суггаргаш, сөөлгү автобуска четтигер дээш, дыка кызар турдувус.
Амгы үеде хоорайның дачалары өскен. Ында школа, уруглар садтары, эмнелге, чунар-бажың, спорт залы дээш шупту бар, сайзырап турар эки-дир.
/ Чечекмаа ОНДАР-ООЛ, күш-ажылдың хоочуну.
Кызыл хоорай.
“Шын” №49 2025 чылдың декабрь 18