Чуртталгада сактыышкыннарым чула-биле дөмей хып кээр. Хоорай черге солун концерттер-даа удаа-дараа болуп-ла турар. Улусчу чогаадылга төвүнге хоочуннарга кайгамчык солун программалыг концерт болган. Ону көрүп чордувус. Чарлакчы-даа кончуг тода, өткүт үн-биле чарлады. Орус улустуң плясказын дөрт аныяк самчылар кончуг чараш кылдыр күүсетти.
1967 – 1968 өөредилге чылында Сүт-Хөлдүң школаларының аразынга башкылар фестивалынга бис, Алдан-Маадыр 8 чыл школазының дөрт аныяк башкызы, орус улустуң плясказын республика фестивалынче киир самнап турганывысты сактып келгеш, олурган бодум тура халааш, адыш часкап, аажок болган мен.
Ынчан школавыс директору Дондуп Мажы-оолович Ондар. Фестивальга школавыс коллективи 1-ги черни алгаш, шаңнадып, мактаткан бис. Интернаттың улуг кижизидикчи башкызы Сендиң Ондар танцывыстың хевин бис дөртке дөмейлештир даарап берген. Школага чаа ажылдап келген аныяк башкылар Хорум-Дагдан Минчиир Уткуновна, Шемиден Эре-оол, Чадаанадан Петр Самдан база мен.
Мээң бо чүүлүмнү номчааш, ол самнап чораанывысты сактып келирлер боор. Ынчан ол танцылап турганывыстың чуруу менде бар. Ол чурукту кижи бүрүзү аңгы парладып, үндүрүп ап болур.
Чылбак МОНГУШ, күш-ажылдың хоочуну, РФ-тиң хүндүлүг башкызы, Маадыр ие.
Сактып келдим
28 июля 2023
24