Тиилелге хүнүн Чазак бажыңының баарынга тук көдүрер езулал-биле эгелээш, Тиилелге шөлүнге «Сактыышкынның оду» деп Россия чергелиг акция-биле доозулган.
Улуг Тиилелгениң 78 чыл болган оюнга тураскааткан янзы-бүрү хемчеглер өөредилге черлеринге, музейлерге, ном саңнарынга, культура одагларынга, уруглар садтарынга майны төндүр уламчылаар.
Кежээкиниң 20 шакта, имир дүжүп турда, Тиилелге шөлүнче углай базыптывыс. Ырактан-на шөлде чыылган хөй кижини эскерип кааш, сагыш-сеткилге патриотчу үзел-бодал оттуп келди. Чыылган чоннуң аразында хоорайның аңгы-аңгы албан-черлериниң төлээлери болгаш ажы-төл, хоочуннар дээш кымны чок дээрил…
Улуг Тиилелге дээш амы-тынын бергеннерниң чырык адынга тураскааткан «Сактыышкынның оду» деп акция 2004 чылда бир-ле дугаар Тюмень хоорайга болуп эрткен. Дараазында чылдарда бүгү-россия чергелиг акция болу берген. Оон бээр-ле Улуг Тиилелге хүнүнүң кежээзинде «Сактыышкынның одун» Россияның аңгы-аңгы булуңнарынга кыпсыры чаңчыл болу берген.
А.ОНДАР.
Авторнуң тырттырган чуруу.