Июль 10-да Россияның шериг алдар хүнүнде «Ада-чурт камгалакчылары» күрүне фондузу биле «Билиг» российжи ниитилелдиң ниити төлевилели эгелээн. Төлевилелди бир дугаар эгелээннерниң аразында Тыва Республика база бар. Уругларның «Юность» кадыкшылга лагеринге ТШО киржикчилери Айдыс Куулар биле Азият Догдугаш школачылар-биле ужуражылганы эрттирген.
«Ада-чурт камгалакчылары» күрүне фондузунуң регионалдыг салбырының удуртукчузу Мерген Кызыл-оол биле «Билиг» российжи ниитилелдиң салбырының директору Эмина Кызыл-оол ужуражылганың киржикчилеринге байырын чедиргеш, сөс алганнар. Олар сентябрьга чедир уламчылаар «Ада-чуртка бараан болуп тур мен» деп акцияның дугайында тайылбырны кылган.
«Силер бистиң күрүнениң келир үеде салгалдары болганыңарда, мындыг ужуражылгаларны эрттирери чугула. Бо хүнде бүгү чуртта «Ада-чуртка бараан болуп тур мен» деп акция эгелээн. Төрээн чуртту канчаар камгалаарының дугайында бөгүн чугаалажыылы»— деп, Мерген Кызыл-оол чугаалаан.
«Тускай шериг кезектериниң хоочуннары» хөй-ниити организацияның даргазы, ТШО-нуң хоочуну, шокар берет эдилекчизи Азият Догдугаш күрүнениң чаагай чоруу дээш чепсектиг дайын-чаага киришкениниң дугайында школачыларга таныштырган.
Регионалдыг «Кара ирбис» хөй-ниити организацияның удуртукчузу, 55-ки мото-адыгжы (даг) бригаданың фельдшери, «Билиг» ниитилелиниң лектору Айдыс Куулар эр кижи быжыг туруштуг болгаш соруктуг болур ужурлуг дээрзин демдеглээн. Кадык амыдыралды сагыыр болгаш спорт-биле өңнүктежири чугула. Бо бүгү чүүл элээдилерге Россияның төлептиг хамаатылары болурунга арганы бээр.
Шериглерниң илеткелдериниң соонда «Кызыл крест» регионалдыг организацияның удуртукчузу, Тывада ММА федерациязының вице-президентизи Буян Сонам биле хостуг хүрешке Европа чемпиону, Россияның элээдилер аразынга ийи дакпыр чемпиону Белек-оол Күжүгет спортчу хүрештер талазы-биле мастер-классты эрттирген.
Июль 10-дан эгелээн «Ада-чуртка бараан болуп тур мен» деп акцияга Россияның 89 субъектизи чайны төндүр киржир. Аныяктар-биле шериг корреспондентилери, ТШО-нуң хоочуннары болгаш киржикчилери ужуражылгаларны эрттирер.
РФ-тиң Президентизи Владимир Путинниң демдеглеп турары-биле алырга, чепсектиг күштерниң кол өзээн ТШО-нуң киржикчилери болгаш хоочуннары тургузуп турар. Олар чуртту удуртурунга база улуг төлевилелдерге киржир ужурлуг.
«Ада-чурт камгалакчылары» күрүне фондузу биле «Билиг» российжи ниитилелдиң ниити акциязы боттарының үлегеринге даянып, аныяктарның патриотчу кижизидилгезинге ТШО хоочуннарын киириштиреринче угланган.
«Ам патриотчу кижизидилгениң көңгүс чаа системазын тургузуп турар, ында Россияның сонуургалдарын камгалап турар кижилер кол рольду ойнап турар. Элээдилерге маадырлыг, эрес-дидим чорук, Төрээн чурт дугайында шынны чүгле ТШО-нуң хоочуннары чугаалап шыдаар. Маадырларның сактыышкыннарын аныяктар дыка эки хүлээп алыр»— деп, Россия Федерациязының камгалал сайыдының оралакчызы, «Ада-чурт камгалакчылары» фондунуң даргазы Анна Цивилёва чугаалаан.
«Билиг» ниитилелиниң акциязының иштинде методиктиг материалдарны ажылдап кылган база спикерлерге өөредилгени чорудуп турар. Кичээлдерниң планын, таныштырылганың тургузуун ажылдап кылган, кижилерниң эң-не хөй салыр айтырыгларынга харыыларны чыгган база назын аайы-биле бөлүктерге хамаарыштыр материалдарны баш бурунгаар көрген.
«Ада-чуртка бараан болуп тур мен» деп акция — аныяк салгалдарга демиселге бодун хайыралавайн, Төрээн чуртувустуң улуг төөгүзүнче кирген маадырлар-биле ужуражыр онзагай арга-дыр. Ындыг ужуражылгалар элээди оолдарга патриотчу чорук болгаш хамааты харыысалга деп чүүлдүң үнезин ханы билип алырынга, дайынчыларның маадырлыг чоруунга сорук кирер арганы берип турар. Ынчангаш бистиң ниити сорулгавыс — ол сактыышкыннар российжилерниң шупту салгалдарын харылзаштырар кылдыр кылыры. Акция үезинде ТШО киржикчилери болгаш шериг журналистер-биле муң ажыг лекцияларны, мастер-класстарны эрттирерин планнап турар бис» — деп, «Билиг» российжи ниитилелдиң чиңгине директору Максим Древаль демдеглээн.
«Ада-чурт камгалакчылары» күрүне фондузу чыл дургузунда 3500 ажыг ТШО хоочуннарын аныяктар кижизидилгезинче киириштирген, бүгү чуртка 25000 ажыг патриотчу угланыышкынныг хемчеглерниң эгелекчизи болган, аңаа барык 500 000 уруглар болгаш аныяктар киришкен.
А. СОЯН белеткээн.
"Шын" №52 2024 чылдың июль 13
![](https://sun9-49.userapi.com/impg/SnqKz38UwB5Yv7bwEw2y1xSYxJPlAnnnUkjZIw/bXjEOaNthhI.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=db4c1a0990cb4346e15ef1f652c8801f&from=bu&u=23JnV1sOES4mW1vhzMipenDHJVOiklccwOzRLpVTwGI&cs=807x605)
![](https://sun4-22.userapi.com/impg/nO5o9XxhJW2WH3nkUThTWtq1Z1TO-gObtCf5gA/QYsYsL-t0ts.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=1d6c3614763761957a068014280fd7d8&from=bu&u=o3hYfT_cxSB_SFc7GXj5FBCpUmIkuofWIYNjgxQR7uw&cs=807x605)
![](https://sun4-20.userapi.com/impg/L0mDr3lS8grn4W1ZMlzbt7SB8aHYzcoitUBWzw/eBlPnVwC2cg.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=828f0fadf6936039e22ee66a888dd340&from=bu&u=0VWiX2gjU92wtJ0-fw97Q3_7W-ulkQqzRoMfvLC4OSU&cs=807x605)
![](https://sun4-18.userapi.com/impg/lNf_h8M4XnSX3j3ZkHWahg21CdEi3LLJ3WGQuw/NwXALls9pEw.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=bc8b58d59ec774ff4bdea416c440a37e&from=bu&u=LHZ0o5xLlw3bKzIQR43F8Qtns_ntG_aabILhxoOeiSE&cs=807x605)
![](https://sun4-20.userapi.com/impg/_MBofSerATheMs3iVYFLL_SdAHj4Z9tn257Dmw/LJAq49leFU4.jpg?quality=95&as=32x24,48x36,72x54,108x81,160x120,240x180,360x270,480x360,540x405,640x480,720x540,1080x810,1280x960&sign=e021a1329d867685648fc31030f23c0e&from=bu&u=pnUnyoDBlemkxS3x4Ibz_yZH3H-prPUOlkyq7_7yF28&cs=807x605)