Таңды кожууннуң Херээженнер чөвүлелиниң даргазы Юлия Иргит:
«Владимир Путин ажы-төл өзүп төрүттүнер талазы-биле Тыва болгаш Чечен республикаларны демдеглээни аажок өөрүнчүг болган.
Ие капиталы, назы четпээн ажы-төлдүг өг-бүлелерге 6 хуулуг ипотека, уруглар пособиези дээн ышкаш социал адырга деткимчези чоннуң амыдыралынга чугула черни ээлеп, улуг деткимче апарган болгай. Ол деткимчени дыка хөй өг-бүлелер ап, амыдыралында боттандырып чоруур. Ооң ачызында хөй ажы-төлдүг өг-бүлелерге амыдыраарынга эптиг байдалдар тургустунган.
Чурттуң келир үезин он-он чылдар бурунгаар-ла Президентиниң бодап турарын демдеглээри чугула. Демографтыг политиканың хөгжүлдезинче болгаш хамааты бүрүзүнүң чедимчелиг амыдыралынче сагыш салыышкыны, ооң бурунгаар көрүжүн бадыткап турар. Бис тус черниң удуртулгазының төлээлери болганывыста, Президентиниң бот-идепкейин деткип, өреге бүрүзүнге чаа эгелээшкиннерниң боттанылгазын чедип алыр ужурлуг бис. Ук хемчеглерниң ачызында ажы-төлүвүске чурттаарынга таарымчалыг байдалдарны тургузуп шыдаптарывыска идегээр мен».
“Шын” №98 2024 чылдың декабрь 21