Республиканың консультация-диагностика төвүнүң дыңнадып турары-биле алырга, бо чылын саргыга ызырткан бир дугаар таварылга апрель 15-те демдеглеттинген. Амгы үеге чедир төпте ниитизи-биле саргыга ызырткан 14 кижи эмчи дузазын алган. Олар шупту саргы энцефалидинге удур тарылга албаан болган.
Саргы ызырыпкан таварылгада Кызыл хоорайның Щетинкин-Кравченко кудумчузунда 1 дугаар республика эмнелгезиниң травматология пунктузунга, а кожууннарга ажыл хүннеринде хүндүс хирург эмчиниң кабинединге баар. Дыштаныр хүннерде азы кежээки үеде дежурный эмчиге чеде бээрге, дузаны кадар.
Саргыны кижиниң мага-бодундан адырган соонда, ооң хора бар-чогун илередири-биле, Калинин кудумчузунда ТР-ниң Гигиена болгаш эпидемиология төвүнүң лабораториязынче эртенгиниң 09.00 шактан 15.00 шакка чедир дужаар. Ону саргыга ызырткан кижи боду аксы хааглыг чук азы шил савага суп алгаш чедирер.
Ол ышкаш чурттап турар чериниң аайы-биле халдавырлыг аарыглар кабинединиң эмчизинге азы педиатр, терапевт, дүрген дуза кабинединге албан баар. Аңаа баарга саргыдан халдап болур аарыгларны болдурбазы-биле, эмчиниң айтыышкыны ёзугаар антибиотиктерни ижип, 1 ай иштинде хайгааралга турары чугула.
Саргы энцефалидинге удур профилактиктиг хемчеглерни база чорудуп турар. Тарытпаан, тарылга курузун долузу-биле албаан, лабораторияга саргы хоралыг деп бадыткаттынган таварылгаларда саргыга удур иммуноглобулинни салыр. Ону саргы ызырган соонда, 4 хонук эртпээнде, деңзизиниң аайы-биле эмниң хемчээлин көрүп тургаш тарыыр.
Эъдиниң изии 38–39 чедип, бажы аарыыр, дескинер, кускузу кээр, кустурар, мага-боду сулараар, кежинге шивишкилер тыптыр, саргы ызырган чер ыжып, кыза бээр дээш оон-даа өске демдектер тыптып келирге, кожууннарның төп эмнелгелериниң халдавырлыг аарыглар салбырынга, Кызылга халдавырлыг аарыглар эмнелгезинге баар.
“Саргы энцефалидинге удур тарытпаан кижилерни албан тарыдып алырын сүмелеп тур мен. Чурттап турар чериниң аайы-биле терапевт азы педиатр эмчиге чеде бээрге, саргыга удур тарып бээр. Тарылга алган соонда, 2 неделя эрткенде, арга-арыг кирип болур” – деп, Республиканың консультация-диагностика төвүнүң инфекционист эмчизи Милана Чошкак чурттакчы чонну саргы энцефалидинге удур тарыдып алырынче кыйгырган.
Чыжыргана СААЯ.
Ада ТЮЛЮШТУҢ тырттырган чуруктары
«Шын» №35 2024 чылдың май 15
