Саргының кончуг көвүдээр үези – час. Эрткен 2024 чылда эң-не баштай март 28-те Мөңгүн-Тайга кожууннуң төвү Мугур-Аксы суурнуң чурттакчызы саргыга ызырткан. Эрткен чылын республикага ниитизи-биле 993 кижи саргыларга ызырткан. Ызырткан кижилерниң чамдыызынга саргының хоранының салдары элээн аар болган.
Бо чылын саргылар кижилерни эрткен чылдыындан эрте ызырып эгелээн. Март 10-да Барыын-Хемчик кожуунда Ак-Довурак хоорайның чурттакчызы аныяк оол саргыга ызырткан. Бо чылын саргының хоразы элээн күштүг боор деп специалистер санап турар. Чүге дээрге эрткен кыштың агаар-бойдузу чылыг болган уржуунда саргылар кышты элээн таарымчалыг байдалга эрттирген.
Саргыга ызыртпазының, ооң хоранындан камгаланырының чаңгыс-ла аргазы – баш удур тарыдып алыры. 2025 чылда план ёзугаар 11 486 кижини саргыга удур тарып сыкыртыр. 22 635 кижиге дагын тарылга чорудар.
Арга-арыг болгаш көдээ ажыл-агыйларның ажылдакчылары, малчыннар, аңчылар, геологтар дээш ажылы арга-арыгга, хову-шөлге ажылдаар кижилерге, өөреникчилерге, башкыларга саргыга удур тарыышкынны халаска чорудуп турар.
Бай-Тайга кожууннуң Шуй сумуда эмчи амбулаториязының фельдшери Буян Чооду Базырак-Адаа деп черлерде чурттап турар чонга саргыга удур тарыышкынны чоруткан. Малчыннарның турлагларынга черниң ыраа 100, 150 километр-даа чеде бээр. Шуй сумуда 27 малчын турлаг бар. Бо ажыл малчыннарның саргы хоранындан камгалаар, ооң хоразын кошкадыр.
Ырак турлагларда малчыннарга саргыга удур тарыышкын чорударынга “Кадыкшылга” национал төлевилел-биле эмчи амбулаториязынга берген УАЗ машина дыка ажыктыг болган.
Ш. МОҢГУШ.
“Шын” №13 2025 чылдың апрель 10