Эрткен неделяда саргыга ызырткаш, эмчи дузазын ап келген 26 таварылга бүрүткеттинген. Эрткен чылдың бо үезинге деңнээрге, 4 таварылга хөй болган.
Неделя дургузунда саргы энцефалидинден аараан 1 таварылга демдеглеттинген. Ниитизи-биле март айдан тура 29 таварылга болган. Оон бээр саргы боррелиозундан 13, риккетсиозтан аараан 13 таварылга бүрүткеттинген.
Саргыга ызыртпазы-биле, дараазында дүрүмнерни сагыыры чугула. Кижиниң хевинге саргы ызыртына бээр болза, көскү эскертингир болур кылдыр чырык өңнүг хептер кедери күзенчиг. Саргы хеп адаанче кирбезин дээш, узун чеңниг хепти кеткеш, чүвүрнүң хончуларын укче азы идикче киир суп алыр. Агаарлаашкын үезинде бөрттү кедери чугула.
Саргылар кижини болгаш дириг амытаннарны оът-сигенге манап чыдар болганда, олурар сандай азы ковриктен ап алыр болза эки.
Ол ышкаш саргы хоюзар тускай херекселдерни база ажыглап болур. Ону канчаар ажыглаарын даштында бижиинден кичээнгейлиг көрүп алыр херек.
Саргы энцефалидинден болгаш ооң берге хевиринден камгаланыр деп бодаар болза, бүдүн чыл дургузунда чорудуп турар саргыга удур тарылганы салдырып алыры чугула. Ызырган соонда, дораан Иммуноглобулинни база салып болур.
Бистиң корр.
Чурукту интернеттен хоолгалаан.
“Шын” № 30 2025 чылдың август 7