Сентябрь 19-21 хүннеринде Бай-Тайганың Тээли суурунга “Сарыг-Хаяның чажыды” деп даш чонар уран чүүлдүң фестивалы болуп эрткен. Ону Тываның сураглыг даш чонукчузу Салчак Чашпайевич Норбунуң 125 чыл оюнга тураскаадып эрттирген.
Фестивальга республиканың аңгы-аңгы булуңнарындан даш чонар уран чүүлдү сонуургап, чонар-даштан кылыгларны сиилбип кылып чоруур мастерлер чыглып киришкен. Ниитизи-биле 2 хонук дургузунда даш чонар мөөрейге 32 кижи киришкен. Мергежээн мастерлерден аңгыда, өөреникчилерниң киришкени өөрүнчүг болган. Оларның эң бичиизи 11 харлыг.
Фестивальдың тиилекчилеринге шаңналдарны Тээлиниң Н. Өлзей-оол аттыг культура бажыңынга байырлыг байдалга тывыскан. Оларның ажылдарын клубтуң фойезинге шуптузун делгеп салгаш, чонга көргүскен.
“Өөреникчилер – даш чонукчулары” деп категорияга Бай-Тайгадан Аю Очур тиилекчи болган.
“Аныяк даш чонукчулары” категорияга Бай-Тайгадан Танаа-Херел Хунан тиилекчи болган. Ол ызыгуур салгаан даш чонукчузу болуп турар. Ооң кырган-ачазы – Россияның болгаш Тываның алдарлыг чурукчузу, сураглыг даш чонукчузу Киров Хунан, ачазы – Аяс Хунан база даш чонукчузу.
Ол-ла категорияга ийи дугаар черни Орлан Сат (Сүт-Хөл кожуун) биле Каң-оол Дажы (Бай-Тайга кожуун) үлешкен. Үшкү черге Артыш Куулар (Бай-Тайга кожуун) биле Артыш Донгак (Чөөн-Хемчик кожуун) олар төлептиг болганнар.
“Хоочун даш чонукчулары” деп категорияга Тываның алдарлыг ажылдакчызы, сураглыг фотограф, журналист Василий Балчый-оол тиилекчи болган.
Фестивальга киржип келген хоочун даш чонукчуларынга шуптузунга “Шымбай” турбаазага дыштанып алыры-биле сертификаттарны ТР-ниң Культура яамызының мурнундан тывыскан.
Фестивальдың шаңналдыг чер алган өске-даа киржикчилери шупту акша шаңналдарын, өртектиг белектерни тус-тузунда алганнар.
Бистиң корр.
Чуруктарны интернеттен алган.
