«Сээң базымың» – Россияның студентилериниң кол төлевилели. Төнчү чок энергия, чаа бодалдар болгаш делегейни эки талаже өскертир күзел студентилерде бар. «Сээң базымың» деп Бүгү-россияның студентилер төлевилели аныяктарның улуг хемчээлдиг ниитилелин тургузарынга дузалаар.
Бо төлевилелди студентилерниң боттарының салым-чаяанын ажыдарынга дузалажыр сорулга-биле ажылдап кылган. Ооң бир үндезини болза студент бүрүзү салым-чаяанныг дээрзин бүзүредири. Ол салым-чаяанны тып, ажыдары чугула. Ынчангаш таныштырылгалар болгаш өске-даа чүүлдер дузазы-биле төлевилелдиң бар аргаларын болгаш оларны студент амыдыралга канчаар ажыглаарын тайылбырлап турар.
"Сээң базымың" төлевилелче янзы-бүрү мөөрейлерни киирген. Оларның утказы чылдан чылче өскерлип турза-даа, аныяктарның удуртукчу шынарларын тодарадырынче, социал ужур-дузалыг төлевилелдерни деткииринче, өөредилге хүрээлеңин сайзырадырынче болгаш студентилер ниитилелин быжыглаарынче угланган болур. Чижээ, бир кижи бөлүк даргазының ролюн шилип алгаш, "Сээң базымың – бөлүк даргазы" деп мөөрейниң чадазы-биле ол рольче шымнып кирер.
Президентиниң «Россия – аргалар чурту» деп платформазынче кирип турар "Сээң базымың" деп төлевилел Аныяктар херектериниң талазы-биле федералдыг агентилелдиң база чурттуң Эртем болгаш дээди өөредилге яамызының деткимчези-биле боттанып турар. Ук төлевилел 2 сая ажыг аныяктарны амгы үеде мөөңнээн.
“Бөгүн төлевилелдиң ажыдыышкынынга киришкеш, дыка хөй чаа чүүлдерни билип алдывыс. Улаштыр боттарывыстың регионалдыг командавысты тургузуп, төлевилелге киржирин күзеп тур бис. Студентилер дыка чай чок амыдыралдыг бис. Культура, спорт болгаш эртем талазы-биле шупту адырларның хемчеглеринде киржип турар бис” – деп, Кызылдың башкы институдунуң студентизи Чойгана Доңгак чугаалаан.
Программага интерактивтиг презентациялар, викториналар болгаш «Сээң базымың» төлевилелдиң беш дугаар сезону-биле таныштырылга болган.
Айыраа САТ.
Чурукту интернеттен алган: yandex.ru/images/sea...
“Шын” №37 2025 чылдың сентябрь 25Оценили 6 человекПоказать список поделившихся